Los sindicatos movilícense pola oficialidá del asturianu

Más d'una docena d'organizaciones sindicales asturianes suscribieron un manifiestu a favor de la oficialidá de la llingua asturiana, presentáu y lleíu va unos díes n'Uviéu pola escritora y periodista Ángeles Caso. Nel testu piden "con enerxía y rotundidá que les fuerces polítiques parllamentaries nun dexen pasar esta oportunidá pa que, al marxe de les lexítimes diferencies ideolóxiques, entamen una reforma estatutaria que garantice l'usu oficial del asturianu y del eonaviego". Los sindicatos consideren "ineludible que, agora que s'abrió una nueva oportunidá na Xunta Xeneral, los partíos políticos apauten algamar l'alcuerdu definitivu qu'asegure un futuru dignu y constitucional pa les llingües d'Asturies". El manifiestu, presentáu nos Cines Foncalada, na capital del Principáu, ta robláu pol Coleutivu de Trabayadores, CC OO d'Asturies, UXT, USO, Suatea, la Confederación Xeneral del Trabayu, la CNT-Asturies y Lleón, la Corriente Sindical d'Izquierda, Izquierda Sindical Asturiana, La Rede de Clase Trabayadora, el Sindicatu Astur Independiente, el Sindicatu Avanza y el SOMA-FITAG-UXT.

"Cola ayuda del Gobiernu del Principáu d'Asturies"