Avilés yá paga por reciclar envases nunes máquines especiales

"Si te lleguen a dar un céntimu cada vez qu'eches daqué ehí, merecía la pena reciclar", facía esti día un usuariu habitual de la plaza d'abastos Hermanos Orbón mientres un grupu de periodistes facía un corriellu cerca d'una máquina de reciclaxe inversu a puntu d'entrar en funcionamientu. L'home atinó dafechu: por cada envase que se deposite nesa máquina –esiste otra asemeyada n'El Atriu– apúrrese un céntimu. El dineru que s'atrope –diez céntimos como muncho al día, trés euros al mes– podrá gastase depués en comercios axuntaos a esta campaña.

El sistema ye cenciellu, y yá s'aplica en grandes ciudaes europees dende va años. Primero hai que descargar un códigu QR nuna páxina habilitada pa ello. En tando delantre la máquina hai que pasar el códigu pel llector que tien la máquina ya introducir l'envase con códigu de barres. El "pagu" puede axuntase o imprimise en forma de ticket al momentu. Como exemplu: si se reciclen diez envases diarios nun mes, l'usuariu va poder disponer de trés euros que se van xenerar nun ticket que depués va poder trocar nos establecimientos axuntaos como descuentu. "Tán cuasi tolos comercios de la plaza d'abastos y munchos del Atriu, pero puede axuntase cualesquier ", dixo la conceyala de Comerciu, Raquel Ruiz. 

En determinaes campañes comerciales, como la próxima de primavera, esos importes de descuentu van ser más elevaos pudiendo llegar en dellos casos hasta los cinco euros. "L'importe xeneráu siempre se va reembolsar a los comercios participantes", sentenció la conceyala. 

Les dos máquines esistentes n'Avilés y yá en funcionamientu son el productu d'un contratu cofinanciáu con fondos Next Generation. El contratu de 35.485 euros llevólu Reciclaxes Blimea. Esti día, ún de los responsables d'esta firma, Alejandro González, tuvo tamién n'Avilés, na puesta en funcionamientu de la nueva máquina que "paga" por reciclar.

"Cola ayuda del Gobiernu del Principáu d'Asturies"