Les empresaries asturianes apuren na ONU a actuar ante'l ciberacosu

La ministra d'Igualdá, Ana Redondo, inauguró la selmana pasada l'actu "Violencia dixital contra les muyeres: hacia polítiques y aliances tresformadores nel marcu Beijing+30", que se celebró, a propuesta de la delegación española, na sede de la ONU en Nueva York dientro del marcu de la selmana de los derechos de la muyer y que tuvo una representación asturiana al traviés de la Federación d'Empresaries Directives d'Asturies (FEDA). La so presidenta, Begoña Fernández-Costales, aseguró que "cada vez son más les moces que se ven afectaes pola violencia dixital".

Nun mundu, el de la empresa, cada vez más dixitalizáu y coles redes sociales siendo, en munchos casos, una fonte d'ingresos nella mesma, dende'l Ministeriu d'Igualdá ven necesario llexislar nesti tipu de violencia, yá que, según los datos del Institutu Européu d'Igualdá de Xéneru (EIGE), una de cada trés muyeres n'Europa foi víctima d'ella, una cifra qu'aumenta naquelles que tienen mayor esposición pública. "Les autónomes nun nos enfrentamos namás a la resquiebra dixital y les dificultaes p'aportar a la financiación, sinón que, amás, tendríemos que la entamar col acosu en redes sociales y la inseguridá nel entornu online ensin qu'esistan mecanismos efectivos de proteición", destacó na conferencia Pilar Mora, secretaria xeneral de la plataforma Autónomes pola Igualdá.

Ye por ello que'l gabinete de Redondo va entamar un pactu d'Estáu contra la violencia de la muyer qu'incluya l'ámbitu dixital. "Hai qu'esixir que les redes eviten l'anonimatu nes publicaciones ofensives pa ellaborar mecanismos de control xudicial", esplicaron dende Igualdá. Na mesma llinia, la presidenta de FEDA secunda les propuestes que sopelexaron nes Naciones Xuníes les sos compañeres d'Autónomes pola Igualdá: "El ciberacosu tien de ser un problema llaboral por que puede llegar a afeutar el desenvolvimientu de l'actividá económica de les muyeres". Amás, na conferencia rescamplóse que, magar nun esiste una definición universalmente aceptada de la violencia de xéneru facilitada pola tecnoloxía, esta puede entendese como cualquier actu de violencia cometíu, asistíu o agraváu pol usu de les TIC con sofitu nel xéneru.

"Ye fundamental enseñar ciudadanía dixital, afalando un usu éticu de los medios y fomentando qu'homes y neños se conviertan n'aliaos pola igualdá de xéneru", aseguraron dende la Federación d'Empresaries y Directives d'Asturies.

"Cola ayuda del Gobiernu del Principáu d'Asturies"