Estes son les razones d'Indra pa escoyer Asturies nos sos planes d'espansión
La firma entama na comunidá'l so plan estratéxicu de producción de blindaos "vista la so rede de proveedores esperimentaos"
Ángel Escribano, va una selmana, nel Congresu de los Diputaos.
El presidente d'Indra, Ángel Escribano, espunxo'l xueves de la selmana pasada nes Cortes los motivos que llevaron a la multinacional española de defensa a apostar por Asturies como territoriu predilectu pa la fabricación de vehículos blindaos de combate, una estratexa que tien como primer pasu la compra del Tallerón de Duro Felguera en Xixón pa convertilu nuna planta industrial onde va construyir unidaes terrestres.
Escribano, que lleva dos meses al mandu d'Indra, afirmó que la producción de vehículos militares "va ser un gran vector de crecimientu industrial que va intentar maximizar les rexones onde tradicionalmente se fabricaron estos equipos". Una d'eses comunidaes ye Asturies, una rexón "fuertemente industrializada" na que, según el direutivu, "hai una rede de proveedores esperimentaos abondo que van suministrar los sistemes que nos faen falta". "Tamos en negociaciones pa concentrar n'Asturies tola nuesa capacidá fabril de vehículos", remarcó.
Escribano espresó con claridá l'oxetivu últimu d'esta estratexa d'Indra, una empresa na que l'Estáu, per aciu de la Sociedá Estatal de Participaciones Industriales (SEPI), controla'l 28% del capital: "Ye un gran pruyimientu del nuesu Ministeriu, de les nueses Fuerces Armaes y del nuesu Exércitu de Tierra tener una gran fábrica nacional". El planteamientu de fondu d'esta operación, talo y como esplicó l'executivu en dellos momentos de la so intervención parlamentaria, ye aumentar l'autonomía española y europea de la industria militar, cuidao qu'anguaño "el 60% del material de defensa que se merca n'Europa ye d'Estaos Xuníos, y el 14%, de fuera d'esos dos territorios".
Pa entamar esi plan fabril, Indra constituyó una filial denominada Land Vehicles, que va tener como primer operación l'alquisición del Tallerón de Duro que, según fontes conocedores, entá nun se formalizó.
"Indra ta somorguiáu nun procesu radical dafechu empobináu a la fabricación. La fabricación ye lo que más valor amiestu xenera; promueve un empléu de calidá, una meyor vida y mires de progresu pa los trabayadores", argumentó Escribano, que punxo como exemplu'l casu de la so anterior compañía, la inxeniería Escribano Mechanical & Engineering: "La fabricación ye lo que creó'l valor de la empresa de la mio familia".
Por aciu de Land Vehicles, Indra quier "volver ser una compañía con capacidá de ponese con tol procesu de diseñu, producción, montaxe, integración de sistemes, puesta a puntu, entrega y caltenimientu".
- Cuando habló en Oviedo el cardenal que ahora avisa de un posible cisma si sale otro Papa como Francisco: 'No soy una copia de él, que tiene serviles aplaudidores
- Caos total en la Y durante dos horas: tres accidentes con un herido, diez vehículos siniestrados y un atasco de más de 10 kilómetros
- Me incliné por ser ginecólogo cuando logramos salvar la vida de una mujer con una hemorragia posparto que parecía irresoluble
- La raza asturiana de perro que necesita ayuda para ser solución contra el lobo: esto piden sus criadores
- El Sella se lo llevó en un tramo poco concurrido, pero que tenía 'fuerte corriente': la tragedia del catalán que se bajó para enderezar su canoa
- Ola de calor en Asturias: los termómetros rozarán la semana que viene los 30 grados
- El cardenal corrupto que quiere ir al cónclave rezó en la Catedral por los mártires de Oviedo
- ¿Por qué los 500 millones para blindados del plan de defensa son una gran ocasión para Asturias? La clave está en dos corredores industriales
