Uviéu promociónase en París: el Camín Primitivu la so gran baza

La capital asturiana peslló con ésitu va unos díes la so participación nel Salon Mondial du Tourisme de París, la feria de turismu más importante de Francia. Ellí, la conceyalía de Turismu, liderada por Alfredo García Quintana, llevo la marca "Uviéu, orixe del Camín". "Esti ye un productu bien afitáu ente los viaxeros europeos; tenemos d'aprovechar esa notoriedá p'asitiar a la ciudá", destacó'l conceyal al traviés d'una nota de prensa na que recordó qu'esta nun yera la primer vegada que participaben. 

Nel stand fueron atendíes mediu millar de consultes de potenciales viaxeros con especial interés nel Camín Primitivu, les rutes de senderismu y otres esperiencies centraes na naturaleza. Amás, dende l'área rescamplaron que la presencia nesti eventu refuerza la estratexa d'Uviéu nel mercáu francés, ún de los principales emisores de turistes. "La ciudá ye especialmente valorada polos viaxeros galos, munchos d'ellos escueyen percorrer el norte d'España en coche o autocaravana. Esti perfil, predominante ente turistes senior, busca destinos seguros, cómodos, tranquilos y con una ufierta cultural y gastronómica de calidá".

Esta ye una parte namás de la estratexa que'l Conceyu tien entamada pa captar a turistes internacionales, cuantimás d'Europa Central. Na cartera d'actividaes tamién tán programaes aiciones específiques pa la promoción de la cocina y dar continuidá a la estratexa entamada en 2024 como Capital Española de la Gastronomía en collaboración cola rede de ciudaes "Saborea España". Amás, van entamase viaxes de prensa y visites p'axentes turísticos en cooperación coles oficines de turismu en delles capitales europees.