La espera pa operase n'Asturies ye más alta qu'enantes del covid, magar la mayor actividá: estos son los motivos

L'actividá nos quirófanos asturianos aumenta, y yá ta perriba con muncho de la que se rexistraba enantes de la pandemia de covid. Sicasí, les demorances qu'aguanten los pacientes siguen siendo más altes que les qu'había enantes de la llegada del coronavirus d'orixe chinu. Y ello magar los esfuerzos d'una Alministración sanitaria que ta echando a los fogones toles hores estres que'l sistema da de sí.

¿Cómo s'esplica esta aparente contradicción? Pel momentu, sobre la mesa hai dos respuestes. La primera: que la recuperación del sistema sanitariu públicu depués de los terribles efectos del coronavirus ta siendo lenta anque gradual y hai que da-y más tiempu. Y la segunda: que la población del Principáu avieya y demanda un volume creciente d'intervenciones quirúrxiques. Va haber que ver, nun analís más fondu, si estes dos claves son convincentes o si, otra manera, hai que buscar otros elementos esplicativos.

Lo que percibe l'usuariu de la sanidá pública asturiana rescampla nestes dos cifres: a finales de 2019, los asturianos aguantaben una espera media de 83 díes pa entrar al quirófanu; cinco años dempués, a finales de 2024, el promediu de demoranza yera de 90 díes. Esto ye, el paciente espera güei siete díes más qu'enantes del coronavirus.

Y lo que nun percibe l'usuariu, pero sí lo faen los xestores y los sanitarios, ye que nos quirófanos ta operándose abondo más que va un llustru: l'añu pasáu, 70.883 procedimientos quirúrxicos, lo que significa 8.377 intervenciones más que nel añu anterior al covid.

El sistema sanitariu opera más, pero tamién recibe más demanda d'intervenciones, supuestamente como efectu del mayor avieyamientu. En 2019, entraron en llista d'espera quirúrxica 64.567 pacientes. L'añu pasáu, esa cifra xubió hasta los 68.995, lo qu'implica una medría de 4.428 indicaciones d'intervención quirúrxica. Según los observadores sanitarios, esta medría de la demanda tamién ye la consecuencia del aumentu d'actividá nes consultes col especialista na sanidá pública asturiana. Cuantes más consultes col especialista s'atienden, más indicaciones de qu'hai qu'operase faen los médicos.

De lo dicho deduzse que, ente 2019 y 2024, aumentaron sustancialmente más les operaciones practicaes (8.377 más) que les entraes en llista d'espera (4.428 más). Con too y con ello, los usuarios tienen d'aguardar güei, de media, siete díes más pa ser interveníos que va cinco años. Verdaderamente, el datu de finales de 2024 yera de 90 díes, mentanto que'l rexistráu un mes más tarde, a finales de xineru d'esti añu, yera de 88 díes, lo que se conoz qu'avala la tesis de que la meyora vien a poco y a poco y que ye cuestión de dar un poco más de marxe a la estratexa actual.

Ye de dominiu públicu que la pandemia de covid-19 xeneró una crisis sanitaria que punxo contra les cuerdes a tola rede pública. Los sos efectos sobre l'atención ordinaria a los pacientes fueron mui agudos en 2020 y 2021, pero dende entós yá pasaron más trés años. Depués de normalizase la vida de los ciudadanos y el funcionamientu de los servicios sanitarios, tocaba reponer la normalidá d'un xeitu gradual. Pero esti oxetivu nun se ta viendo cenciellu de consiguir magar que'l Serviciu de Salú del Principáu (Sespa) nun ye que tea afalando al máximu los programes d'hores estraordinaries de la so plantía, sinón tamién les derivaciones a la sanidá privada.

"Cola ayuda del Gobiernu del Principáu d'Asturies"