La sidra asturiana con burbuya pierde gas y busca una mayor entrada nos restaurantes

La sidra natural esplumoso que s'ellabora cola garantía de la Denominación d'Orixe Protexida (DOP) pierde gas nos mercaos. En degolando tolos sos récords en 2021, con un total de 156.000 botelles, nos postreros trés exercicios esperimentó un enclín a la baxa que llevó al productu a asitiase per debaxo de la barrera de los cien mil envases, depués d'una perda d'unos siete mil al respeutive de 2023. Concretamente, en 2024 comercializáronse 97.000 botelles de sidra esplumoso, según se conseña na memoria qu'acaba d'asoleyar'l conseyu regulador de la marca y que demuestra que la sidra natural d'escanciar sigue copando la producción, con un 98 por cientu del total. En 2024, el conseyu apurrió 4,5 millones de contraetiquetes pa esta sidra más tradicional, lo que supunxo'l récord históricu de la denominación d'orixe, magar que foi un exerciciu d'escasa collecha de mazanes por mor de la vecería, fenómenu que consiste en qu'a un añu de bayura síguelu otru d'entreseca.

La sidra natural esplumoso tien una competencia perfuerte por parte de variedaes axampanaes que nun tán acoyíes a la denominación y que, por tanto, nun ufierten al consumidor la garantía de tar ellaboraes namás con mazana autóctona. Amás, como aspeutu diferenciador tocantes a calidá, hai que tener en cuenta que la sidra esplumoso avalao pola DOP llógrase por aciu d'una segunda fermentación en recipiente zarráu, de forma que'l so gas carbónicu ye siempre endóxenu y nunca amestáu. Anguaño, ellaboren esti productu cinco llagares asturianos. El grupu El Gaitero tien nel mercáu les marques El Gaitero Etiqueta Negra, Pomarina y Valle Ballina y Fernández; El Gobernador, tamién de Villaviciosa, ellabora Emilio Martínez; los xixoneses de Trabanco ufierten Poma Áurea (Trabanco); la naveta Viuda de Angelón viende Prau Monga, y, dende Llugones, Sidra Fran produz Ramos del Valle.

El sector entiende que'l calter natural, la versatilidá y la baxa graduación alcohólica (unos siete graos) son les bases sobre les que tien de crecer la sidra natural esplumoso, que yá consiguió entrar en restaurantes asturianos con estrelles Michelin y afítase na hostelería de gama media y alta pa recuperar la sienda del crecimientu. Una de les estratexes del conseyu regulador ye llograr qu'esi tipu de restaurantes ufierten a los sos veceros cartes de sidres bien surtíes de marques y variedaes, como pasa col vinu. Amás, tamién se quier rescamplar que, na mesa, esta bebida nun queda acutada namás al brinde qu'abre o cierra una comida o una cena, sinón que tamién ye amañosa p'acompañar tolos platos que se sirvan.

Teniendo en cuenta'l tirón que supon el fechu de que la cultura de la sidra asturiano fuera reconocida como Patrimoniu Cultural Inmaterial de la Humanidá, la fueya de ruta pa que les sidres esplumoses y de mesa de la DOP ganen mercaos tamién pasa porque tean presentes como bebíes institucionales nos brindes oficiales que se faigan nel Principáu.

"Cola ayuda del Gobiernu del Principáu d'Asturies"