Abiertu'l procesu de seleición de la direición del Belles Artes d'Asturies y la xerencia de la OSPA

La Conseyería de Cultura del Principáu publicó va unos díes nel Boletín Oficial del Principáu (BOPA) les convocatories pa cubrir les vacantes na direición del Muséu de Belles Artes d'Asturies y la xerencia de la Orquesta Sinfónica del Principáu d'Asturies (OSPA). 

La presentación de candidatures va tar abierta hasta'l 18 d'abril, nel casu del Muséu, y hasta'l 16 d'abril, pa la OSPA. 

Nel casu de la direición del Belles Artes, los candidatos tienen de tener una titulación universitaria venceyada a la xestión cultural o les práctiques artístiques y esperiencia acreditable en direición de museos o centros d'arte. El conocimientu del contestu artísticu asturianu y un altu nivel de castellán ya inglés son requisitos imprescindibles.

El procesu de seleición va constar de trés fases: valoración de méritos (máximu 29,5 puntos), presentación d'un proyeutu de direición (30) y una entrevista (20) cola comisión d'espertos que va coordinar toles fases y va tar compuesta por dos representantes de la xunta de gobiernu del organismu, cinco persones esternes d'acreditada esperiencia y otra que va actuar como secretaria.

Los aspirantes a la xerencia de la OSPA tendrán d'acreditar esperiencia cuandu menos de dos años na xestión d'instituciones musicales o culturales, amás de conocencia fonda del ámbitu orquestal. Va valorase especialmente la esperiencia en captación de recursos, planificación de xires y relaciones institucionales. Amás, pídese un altu nivel d'español ya inglés.

El procesu de seleición pa esti puestu tamién va constar de trés fases: valoración de méritos (40 puntos a lo más), presentación d'un proyeutu estratéxicu (30) y una entrevista d'evaluación (30). Tol procesu va tar empobináu por una comisión de valoración integrada por dos miembros del conseyu rector de la OSPA y cinco persones d'acreditada esperiencia nel ámbitu musical.

Les bases completes y los requisitos pueden consultase enllaces que vienen darréu: 

• OSPA: https://tinyurl.com/2k2c2dwb 
• Muséu de Belles Artes: https://tinyurl.com/ymavat4w 

La Conseyería de Cultura tamién tien abiertu'l procesu de seleición del direutor de Llaboral Centru d'Arte, Creación Industrial y Promoción Cultural. Les candidatures tienen de presentase primero del 5 de mayu. Los candidatos tienen d'acreditar, amás de titulación universitaria venceyada al ámbitu de la xestión de proyeutos culturales y práctiques artístiques contemporanees, una esperiencia cuandu menos de cinco años en siquier ún d'estos ámbitos: práutiques artístiques contemporanees, xestión de proyeutos culturales o xerencia económica y captación de recursos pa proyeutos culturales. Tamién se va valorar el grau de conocencia del contestu artísticu asturianu contemporaneu.

"Cola ayuda del Gobiernu del Principáu d'Asturies"