Otra consecuencia de la descarbonización: Asturies consume per primer vegada más lletricidá de la que produz al añu

Asturies yá depende de fuera pal so suministru eléctricu. La transición enerxética peracabó'l valtu. A lo llargo de 2024, la demanda lléctrica del Principáu foi de 8.594 xigavatios hora (GWh), lo que representa un incrementu del 3,2% al respeutive del añu anterior, mentanto que la producción baxó a 7.775 GWh. Per primer vegada rexistróse un saldu negativu añal n'Asturies, de 819 XWh según Rede Eléctrica, l'operador del sistema n'España. 

Les interconexones lléctriques –con importantes faltes según el Gobiernu del Principáu– son agora más determinates que nunca pa garantizar el suministru enerxéticu d'Asturies, comunidá que tien un potente sector industrial electrointensivu al que-y fae falta un suministru fiable y qu'amás tien importantes proyeutos de descarbonización que van suponer una creciente llectrificación de los procesos.

Rede Eléctrica presentó esti día nel Ministeriu pa la Transición Ecolóxica el so "Informe del sistema lléctricu español 2024" y "Les anovables nel sistema lléctricu español 2024", documentos de nos que se rescampla que la demanda lléctrica d'Asturies supunxo'l 3,5% por cientu del total rexistráu a nivel nacional l'añu pasáu –por mor sobremanera del pesu de la gran industria– y qu'el 43,5 % de la so producción total vieno de fontes anovables, el valor más eleváu desque esisten rexistros y mui perriba del 37,2 % del añu anterior.

Sicasí, el mayor pesu de le anovables nun se debe a un mayor incrementu de la potencia instalada n'enerxíes verdes. Débese a la cayida de la xeneración con carbón y con gas. Magar ello, a lo llargo de 2024 la producción lléctrica asturiana siguió tando liderada pol carbón, que baxó un 7,3 % y cerró l'añu como tecnoloxía responsable del 35,7 % del total; siguida pola hidráulica (23,6 % en rexistrando un aumentu del 6,7% por aciu de les condiciones meteorolóxiques favorables); el ciclu combináu, que baxa un 46% y algama una cuota del 17,7%, y la eólica, responsable del 16,8%. Completen el mix de xeneración asturianu la solar fotovoltaica, el continxente d'otres anovables, el de residuos non anovables y la coxeneración, qu'axunten el 6,2% restante, según los datos de Rede Eléctrica.

Tocantes a la potencia de xeneración instalada n'Asturies, a 31 d'avientu de 2024 xubía a 3.827 megavatios (MW), de los cuálos 1.600 MW correspuenden a enerxía anovable, lo que supon un 41,8 % del total. El carbón siguió siendo la tecnoloxía con más MW instalaos n'Asturies, con una cuota sobre la potencia instalada del 32,7 % del total, siguida pel ciclu combináu (22,3%), la hidráulica (21,1%) y la eólica (18,3%). Los continxentes d'otres anovables y de residuos non anovables, xunto cola solar fotovoltaica y la coxeneración completen la estructura de capacidá de xeneración n'Asturies, col 5,6 % restante.

"Cola ayuda del Gobiernu del Principáu d'Asturies"