L'alumnáu de Llingua Asturiana, ensin profesoráu y con ratios desbordaes, según l'asosiación de docentes d'asturianu

L'Asociación de Docentes d'Asturianu y Eonaviego/Gallego-Asturiano (ADAE) señala la falta de previsión y la "pasividá" de la Conseyería d'Educación énte la enseñanza de Llingua Asturiana en Secundaria y argumenten que les bolses d'esta especialidá yá s'escosaron, "ensin qu'hasta'l momentu procedieren a la so apertura, lo que va impidir cubrir les baxes y va dexar al alumnáu ensin profesoráu, como yá asocedió en cursos pasaos".

Según detalla l'ADAE nuna nota de prensa, esta falta de respuesta de parte de la Conseyería pon en riesgu'l drechu del alumnáu "a recibir una educación de calidá", lo que tamién va tener un impactu na matriculación.

Per otru llau, ADAE detalla que la Conseyería "sigue ensin autorizar l'entamu del cursu d'A2 de Llingua Asturiana nel CEPA del Nalón", a pesar de qu'hai 21 persones adultes inscrites dende'l mes de setiembre.

"Tamos yá nel mes de marzu y l'alumnáu sigue ensin recibir respuesta, lo que supon una nueva torga pa los que quieren meyorar la so competencia n'asturianu", fae l'asociación.

Dificultaes na enseñanza de la llingua asturiana

A tolo anterior, ADAE axunta la situación del maestru de Llingua Asturiana del CP Valdellera (Llanes), que tien al so cargu dende'l mes de xineru a 29 escolinos nun aula namás, superando la ratio establecida.

Esto, segun informen, débese "a la negativa de la Conseyería a aumentar la xornada del docente", alegando qu'otra persona del centru ta habilitada pa ello, "lo que supondría un cambiu d'horarios y l'amenorgamientu de refuerzos educativos nun centru con recursos personales yá de por sí deficitarios".

Amás, la asociación tamién apunta qu'un añu depués del anunciu de la Conseyera d'Educación de la implantación de la enseñanza de llingua asturiana y eonaviego/gallego-asturiano na etapa d'Infantil y nes Escueles Oficiales d'Idiomes, nun hai información dalguna sobre'l so entamu.

"Dende ADAE tenemos mieu que les 103 places anunciaes nun seyan tales y obliguen a asumir la docencia a otres persones del centru habilitaes, aumentando asina la carga docente y menguando los recursos personales p'atender a les diferencies individuales", y por esti motivu piden-y a la Conseyería d'Educación "qu'actúe darréu pa solucionar estos defectos".

"Cola ayuda del Gobiernu del Principáu d'Asturies"