Abiertes les inscripciones pa les pruebes de Certificación de la Llingua Asturiana 2025

El Principáu d'Asturies ya asoleyó la fecha pa les pruebes de certificación de llingua asturiana pal añu 2025, que permiten acreditar la competencia llingüística nos niveles Básicu A2, Entemediu B2 y Avanzáu C1, acordies col Marcu Común Européu de Referencia pa les Llingües (MCER), y que va tar abiertu del 28 d'abril al 15 de mayu.

Según detalla la convocatoria publicada nel Boletín Oficial del Principáu d'Asturies (BOPA), les solicitúes tienen de presentase al traviés del modelu normalizáu disponible na sede electrónica del Principáu, acompañaes de la documentación que fai falta y del xustificante de pagu de la tasa d'inscripción, establecida en 31,63 euros.

Tán dispensaes d'abonar esta tasa les persones con una discapacidá reconocía igual o superior al 33%, asina como les víctimes d'actos terroristes y los sos familiares.

Esamenes en llingua asturiana

Estes pruebes realícense en dos bloques, siendo'l primeru'l 27 de setiembre na Escuela Oficial d'Idiomes d'Uviéu, y consta d'exercicios de comprensión de testos orales y escritos, lo mesmo que de producción escrita.

El segundu bloque va desenvolvese a partir del 6 d'ochobre nel IES Alfonso II d'Uviéu, y va evaluar la producción y coproducción de testos orales y la mediación.

Pa participar nestes pruebes fae falta tener cuandu menos 16 años cumplíos en 2025 y queden escluyíos de la convocatoria'l personal docente y tolos que participaren na organización o evaluación de les mesmes.

Les persones interesaes van poder consultar los llistaos provisionales d'almitíos y escluyíos a partir del 27 de mayu, y van tener un plazu de trés díes pa presentar alegaciones. La llista definitiva va publicase'l 11 de xunu.

"Cola ayuda del Gobiernu del Principáu d'Asturies"