Iniciativa pol Asturianu presenta'l so V Seminariu, que va afondar na discriminación llingüística

Iniciativa pol Asturianu presentó va unos díes el programa íntegru de la quinta edición del seminariu "Oficialidá, el camín constitucional de futuru pal asturianu", que va desendolcase los díes 4 y 5 d'abril nel Edificiu Históricu de la Universidá d'Uviéu.

L'alcuentru, qu'esti añu lleva'l sotítulu "Un mundu enllenu de llingües: cómo combatir la discriminación llingüística", foi presentáu por Iván Llera y Claudia Elena Menéndez, presidente y vicepresidenta de la entidá respeutivamente, qu'esbillaron los dieciséis actos qu'inclúi la programación del simposiu.

La inauguración institucional del foru va cuntar cola presencia d'Ignacio Villaverde, rector de la Universidá d'Uviéu y de Claudia Elena Menéndez como vicepresidenta de la organización.

Depués d'ello, xunto con Inaciu Galán, la vicepresidenta va dar anuncia de l'apertura del "Buzón del asturianu", un nuevu proyeutu de la organización de reivindicación llingüística que pretender ser una ferramienta pa recoyer denuncies de discriminación llingüística.

Seminariu sobre'l futuru del asturianu

La programación d'esti alcuentru va empezar el día 4 tratando asuntos relacionados cola discriminación llingüística, y el segundu día va ser p'averase a esperiencies d'otros territorios con llingua propia pero ensin estatus d'oficialidá como ye'l casu del asturianu.

El programa d'actos va siguir cola proyeición d'un nuevu documental tituláu "L'asturianu nes escueles, una asignatura pendiente", qu'afonda y analiza la presencia del idioma na eduación cola participación de docentes, padres, madres y representantes de sindicatos y otres entidaes.

Esi mesmu día va falase sobre la importancia de trabayar en rede y la importancia de caltener el vocabulariu n'asturianu propiu de la sidra. Amás, Xuan Miyar va presentar la so obra nueva de rellatu curtiu "Hestories del más acá".

Según la asociación, "esti actu pretende ser una motivación pa demostrar que nunca ye tarde pa deprender la to llingua propia a pesar de la discriminación llingüística y, después d'ello, animáse a escribir n'asturianu".

El seminariu va cerrase cola intervención musical de la soprano Susana Gudín, Srta. Mortem, que va interpretar pieces llíriques n'asturianu y n'eonaviego, amás d'una breve visita guiada temática peles cais d'Uviéu "na que se pretende averar a los participantes a la hestoria del asturianu", tal y como expliquen.

La entrada al V Seminariu Oficialidá ye llibre. Sicasí, pa una meyor organización del eventu, les persones interesaes puen inscribise nun formulariu que ta disponible na páxina web d'Iniciativa pol Asturianu.

"Cola ayuda del Gobiernu del Principáu d'Asturies"