Los hoteles d'Uviéu, los sestos más caros de la cornisa cantábrica

Uviéu asitia como la sesta ciudá cola tarifa hotelera más elevada de la cornisa cantábrica, con un preciu mediu de 65,53 euros por nueche, según l'Institutu Nacional d'Estadística (INE). La capital asturiana ponse asina perriba de destinos como Xixón (62,71 euros), Santiago de Compostela (63,02) o Vigo (56,31), mentanto que'l ranking encabézalu San Sebastián con 90,66 euros, siguida de Bilbao (85,56) y Sanxenxo (71,85).

L'informe del INE analiza la tarifa media diaria de los hoteles en trece ciudaes del norte d'España, un datu que se llogra estremando los ingresos totales xeneraos polos establecimientos ente'l númberu d'habitaciones reservaes. Nel casu d'Uviéu, la tarifa media esperimentó un incrementu del 7,46% nel últimu añu, pasando de 60,99 euros en febreru de 2024 a los 65,53 actuales.

Estos datos lleguen nun momentu nel que l'equipu de gobiernu municipal afitó como oxetivu algamar los 1,3 millones de pernoctaciones a lo llargo d'esti mandatu, dempués de superar el millón nos dos últimos años. Hasta febreru, Uviéu contabilizó 56.036 viaxeros, frente a los 61.247 rexistraos nel mesmu periodu de 2024. "La crecedera acumulada de viaxeros y pernoctaciones dende 2019 ye del 27,60% y del 28,04%, respeutivamente. Estes cifres son un reflexu claru de les meyores llograes gracies a una estratexa turística bien definida", sorraya'l conceyal de Turismu, Alfredo García Quintana.

Magar l'aumentu del preciu mediu de los hoteles, el númberu de pernoctaciones rexistraes en febreru foi de 100.508, una cifra inferior a les 113.497 del mesmu mes del añu pasáu. Dende'l Conceyu venceyen esti descensu al calendariu, yá que en 2024 los más de los díes de la ponte d'Antroxu cayeron en febreru, mentanto qu'esti añu celebróse en marzu. Amás, Quintana matiza que les encuestes oficiales contabilicen namás les pernoctaciones n'hoteles, quitando les viviendes turístiques, un segmentu en puxanza na ciudá con 651 pisos rexistraos nel Principáu.

L'analís del INE confirma a Uviéu como ún de los destinos urbanos más relevantes del norte, con una ufierta que, magar la xuba de precios, sigui atrayendo viaxeros. La evolución del turismu na ciudá tuvo marcada pola creciente apuesta por eventos culturales y deportivos como factores clave p'atraer visitantes. 

Otru indicador del crecimientu del sector ye l'empléu hoteleru. En febreru, Uviéu rexistró 534 trabayadores nel sector, frente a los 501 de xineru. "El nuesu oxetivu ye siguir siendo un modelu de referencia nel turismu nacional, creando esperiencies úniques qu'arriquezan a los que nos visiten y refuercen el venceyu de la nuesa ciudá col patrimoniu cultural y la hestoria", conclúi Quintana.

El sector turísticu uvieín confía en que la llegada del branu impulse la ocupación. El retu, según fontes municipales, ye reafitar esti enclín al alza y asitiar a Uviéu como un destín de referencia dientro del turismu de calidá.

"Cola ayuda del Gobiernu del Principáu d'Asturies"