Asturies rexistró un total de 1.944 accidentes de tráficu, con 37 muertos en 2024

Les carreteres asturianes rexistraron l'añu pasáu un total de 1.944 accidentes de tráficu con víctimes que dexaron 37 persones finaes, 221 hospitalizaes y otres 2.345 feríes a les que nun-yos fizo falta hospitalización, según el balance provisional publicáu esti día pola Direición Xeneral de Tráficu (DXT). El númberu de finaos menguó en siete al respeutive de los 44 contabilizaos en 2023, mentanto que la cifra d'hospitalizaos menguó en 19.

Por tipu de víes, les interurbanes axuntaron 827 accidentes con víctimes que dexaron 27 finaos y 121 hospitalizaos, mentanto que nes urbanes morrieron 10 y otres 100 resultaron mancaes con necesidá d'hospitalización nun total de 1.117 accidentes.

Fuera d'autopistes y autovíes prodúcense un 80 por cientu de los accidentes con víctimes (662), un 81 por cientu de los finaos (22), un 82 por cientu de los hospitalizaos (99) y un 76 por cientu de los mancaos leves (830).

El tipu de vehículu con mayor númberu de finaos foi'l turismu col 59 por cientu del total (16) y la motocicleta, col 19 por cientu (5). El balance rescampla un aumentu de la siniestralidá nes víes urbanes, con 96 accidentes con víctimes más qu'en 2023, cuatro finaos más y trece hospitalizaos más.

La DXT tamién llamó l'atención sobre los vehículos de movilidá personal (VMP), porque la so accidentalidá creció de siguío, dende los 15 accidentes con víctimes en 2020 a 107 en 2024, añu en que los mancaos hospitalizaos fueron 7 y los ensin hospitalizar 94.

Según el balance analizáu nuna xunta de la Comisión de Tráficu, Seguridá Vial y Movilidá Sostenible del Principáu celebrada na Delegación del Gobiernu, estos datos enxarétense nun crecimientu de la movilidá del 5 por cientu. Al respeutive de les infracciones, el balance destaca l'aumentu de les distracciones nun 18 por cientu y del escesu de velocidá nun 16 por cientu. 

Ente les actuaciones previstes pa 2025 inclúyense la renovación progresiva de paneles informativos, l'allugamientu de cámares adicionales en puntos estratéxicos y estudios p'afayar dinámicamente la velocidá en viaductos. Amás, va haber radares pedagóxicos rotativos en travesíes.

"Cola ayuda del Gobiernu del Principáu d'Asturies"