Marina Civil gradúa a 43 alumnos que van llevar a Asturies "pel mundu"

Asturies tien dende va unos díes 43 nuevos marinos que van llevar al Principáu "pel mundu" y tolos sos océanos. La Escuela Superior de Marina Civil de la Universidá d'Uviéu celebró esti día la ceremonia d'entrega de diplomes de les titulaciones académiques y profesionales de la Marina mercante. Anque al actu en sí namás pudo aportar aprosimao'l 50 por cientu de los alumnos, 21 en concretu, la "pena" y la "allegría" alendaron a partes iguales.

Foi por dos motivos, que resumió'l rector de la Universidá d'Uviéu, Ignacio Villaverde. Per un llau, la murnia lóxica por perder un eventu tan "guapu, emotivu y allegre", como calificó'l rector; per otru, el sentimientu d'aliviu col bálsamu de que los ausentes tán embarcaos, "con un trabayu o nes sos primeres práctiques". "Quixéramos tenelos a toos xuntos, pero si yá trabayen namás terminar ye que tán perbién formaos", emponderó Villaverde, que siguió coles sos bones palabres pa la escuela universitaria. "Ye un indicador de la so potencia y del so altu nivel d'empleabilidá", remarcó nel actu'l Rector.

A la opinión de Villaverde axuntóse'l direutor de Marina Civil, Rubén González, que se congratuló de que los mozos tean, "afortunadamente", trabayando y derrompiendo los mares, principalmente per agües españoles y europees nestos momentos. "Tán embarcaos en cruceros, buques de servicios y de toa triba", concretó González. El direutor tamién se pronunció sobre'l númberu "creciente" d'estudiantes que se matricula nes titulaciones qu'ufierten a lo llargo de los últimos exercicios". "L'oficiu ta teniendo bastante tirón", concluyó'l decanu de Marina, nun actu emotivu pa los alumnos al qu'allegó tamién la conceyala de Facienda del conceyu de Xixón, la forista María Mitre, y el viceconseyeru de Ciencia, Anovación, Investigación y Tresformación Dixital, Iván Lucas del Amo.

"Los ésitos d'estos alumnos son los de tolos ciudadanos de Xixón", concluyó la edil, mientres que l'altu cargu del Principáu abrió les puertes de la conseyería a los egresaos pa investigar, tamién na economía azul, nuna comunidá que, con Xixón y Avilés, "vive de cara a la mar".

"Cola ayuda del Gobiernu del Principáu d'Asturies"