La tercer edición de MELLA revela pieces audiovisuales inédites de Llanes

La Muestra Intercultural de Cine, Educación y Archivo (MELLA), va celebrar la so tercer edición del 24 al 27 d'abril en Llanes, afitándose como un eventu clave nel panorama cultural d'Asturies. Esta iniciativa, impulsada pola cineasta Celia Cervero y coordinada por Sergio Valbuena Pantiga, cuenta cola collaboración del Conceyu llaniscu y tien como oxetivu promover el cine y la fotografía como archivos de valor etnográficu y cohesión social. 

MELLA "en fueya"

L'eventu va dar el so pistoletazu de salida cola inauguración de la esposición fotográfica "Presente", que va cuntar coles imaxes creaes polos alumnos del IES de Llanes, que participaron nun taller de fotografía estenopeica impartíu pol colectivu "Fotolateras". Les artistes Lola Barcia y Marinela Forcadell, responsables del proyeutu, usen lates de metal pa crear fotografíes analóxiques, una téunica que MELLA busca rescatar y compartir, especialmente colos más mozos.

La inauguración, d'entrada llibre , va ser el xueves 24 a partir de les 12:00 hores na Casa de Cultura de Llanes.

MELLA "proyeuta"

El 25 d'abril, a les 19:00 hores, va proyectase "El Portero", un llargumetraxe dirixíu por Gonzalo Suárez que cumple el so 25 aniversariu dende'l so estrenu. Rodada nel corazón de Llanes nel añu 2000, la película ye un western futbolísticu ambientáu en plena postguerra asturiana y protagonizáu por Carmelo Gómez y Maribel Verdú. La cinta recibió la nominación a los Premios Goya pol Meyor Guion adaptáu, ente otres reconocencies.

MELLA "nel llugar"

Ún de los momentos destacaos d'esta edición va ser l'alcuentru en formatu sesión vermú con Pablo Gómez Sala y Sara Blas Bolonio, direutores de MOCA (Muséu Online de Cine Autobiográficu). La cita, que va tener llugar el 26 d'abril a les 13:00 hores nel Casinu de Llanes, va permitir conocer el relatu de delles de les pieces audiovisuales autobiográfiques más icónicas rescataes hasta la fecha .

Darréu, a les 17:30 hores, van proyectase cinco actos de los postreros ya inéditos materiales fílmicos recuperaos pol investigador José Antonio Anca Gómez y Charo Gómez Haes, presidenta de l'Asociación de Muyeres d'empresa y donante de los materiales. Dambos van tar acompañaos, de la mesma, por José Luis Villaverde Amieva, del Muséu Etnográficu del Oriente, y la periodista Almudena Iglesias.

El material audiovisual, rodáu en 8mm, amuesa escenes cotidianes de la familia Haes en Porrúa y en Puebla (México).

Chigre y pandereta

MELLA va poner puntu final a la so tercer edición con una sesión vermú al cargu de les pandereteres Nun Tamos Toes. El proyeutu musical axunta tradición y modernidá, usando la pandereta, el panderu y los cantares tradicionales como base, pa ufiertar una mirada crítica a l'actualidá, cargada con nueves lletres enllenes de reivindicaciones feministes.

La sesión va tener llugar el domingu 27 d'abril, a partir de les 12:30 hores, na Parrilla la Veguca, en San Roque del Acebal.

"Cola ayuda del Gobiernu del Principáu d'Asturies"