Los 16 pozos mineros que'l Principáu quier convertir en centros de datos

El Principáu va convertir esti añu'l pozu San Jorge, n'Ayer, nun gran centru de datos. La Conseyería de Ciencia espera sacar d'equí a poco a concursu públicu les obres de "adecuación de los edificios esteriores del pozu San Jorge, que va allugar el futuru centru de datos del Principáu", un equipamientu que va almacenar la información de l'Alministración autonómica y que s'espera que permita "atraer a empreses del sector". Les obres de reforma van facese a lo llargo d'esti añu y cuéntase con que les primeres máquines s'instalen en 2026. El proyeutu tien 3 millones d'ayudes del llamáu Fondu de Transición Xusta.

Ye la primer tresformación d'un pozu mineru nun centru de datos, y l'alministración asturiana quier que sirva d'imán pa qu'empreses privaes sigan el mesmu camín y utilicen les antigües instalaciones mineres p'allugar les sos "nubes" de datos. La Conseyería de Ciencia, en collaboración con empreses del sector, principalmente Hunosa, tien catalogaos otros 16 pozos, amás de San Jorge, que podríen siguir el mesmu camín. En total axunten 805.559 metros cuadraos de terrén, la mayoría pendientes de desarrollu urbanísticu, nos que podríen instalase estos equipamientos. Ello ye, que son los pozos Sotón y Cerezal en Samartín del Rei Aurelio; Montsacru, en Morcín; Candín I y II, María Luisa y Samuño, en Llangréu; Figareo, Llamas, Trés Amigos, Polio y San José, en Mieres; San Antonio, n'Ayer; Pumarabule y Mosquitera I, en Siero; y Mosquitera II ente Llangréu y Siero.

El Principáu y Hunosa trabayen en poner a disposición de les empreses tou esi terrén por que puedan desendolcar los sos proyeutos, xenerando asina una "nube asturiana" qu'ufierte soluciones teunolóxiques, garantice la ciberseguridá y faiga posible trabayar con intelixencia artificial, big data o l'internet de les coses (IoT).

Nel casu del pozu San Jorge, en Caborana (Ayer), el Principáu va actuar sobre la sala de la máquina d'estracción, la sala d'embarque y el castillete. Na sala de la máquina d'estracción propónse llevantar dos plantes p'acoyer hasta 70 armarios de servidores de datos, unidaes d'almacenamientu y alimentación. Esti espaciu podría contener más de 1.600 procesadores y superar les 105.000 unidaes de procesamientu independientes (núcleos), señala l'anteproyeutu.

Un centru de procesu de datos d'esti tipu consume unos 10.000 llitros d'agua al día, según les estimaciones del Xestor d'Infraestructures Públiques de Telecomunicación del Principáu d'Asturies (Gitpa). San Jorge ta conectáu a un sistema d'estracción d'agua del interior de les galeríes, polo que se va disponer d'acuíferu propiu pa esfrecer los equipos ensin recurrir a la rede xeneral. Al respeutive de la enerxía, la demanda valorada ye de 30 kilovoltios al día. El pozu tien dos llinies d'alta tensión que garanticen esi suministru. 

Toes estes ventayes pa la instalación de centros de datos, l'agua, la eletricidá y les instalaciones, son comunes a tolos pozos mineros. Amás d'esto, San Jorge dispon tamién d'una completa rede de comunicaciones per fibra óptica –con un aniellu interior– y ta nun enclave estratéxicu, cercanu a una llinia de fibra de la rede Asturcón, con conexones direutes a los campus universitarios de Mieres y Xixón y al edificiu de servicios múltiples del Principáu (EASMU) y al centru de procesu de datos.

"Cola ayuda del Gobiernu del Principáu d'Asturies"