La hostelería denuncia l'aumentu de veceros qu'acuten y nun van

Xixón foi líder dafechu en turismu la pasada ponte del Primeru de Mayu, según los datos de la patronal Otea, que destaca el "impactu positivu" d'eventos como'l Vespa World Days. La ciudá rexistró una media d'ocupación del 92%, cifra mayor qu'en Selmana Santa. Per detrás asitió Uviéu, con un 88%, siguíu del Oriente (70%) y del Centru y Occidente (63%).

Otea aplaude l'actividá del festival de Vespes, "que xenera una importante actividá en restauración". La patronal aprovecha, de camín, pa criticar como fixo n'otres ocasiones el modelu "de dellos grandes festivales" que vienes surdiendo nos últimos tiempos n'Asturies. "Al ufiertar una completa llista de servicios como gastronomía, bebida, inclusive agospiamientu, dientro del so propiu recintu, terminen por 'secuestrar' al visitante, llindando o anulando la so interaición económica colos negocios fuera del perímetru del eventu".

El turismu rural tamién tuvo bonos datos n'Asturies na ponte, con una ocupación media del 82%, cifra positiva al superar la previsión inicial del 62%. Nesti sen, esti sector revelóse, según Otea, como "mediu ideal pa escapaes curties".

Pero la ponte del Primeru de Mayu tamién dexó "esmoliciones" nel sector turísticu asturianu, como la cayida del gastu mediu, que Otea califica d'esmolecedor, lo mesmo que l'enllancamientu de les cenes, con reserves más bien conteníes. Amás, el "non show", esto ye, el nun presentase a les reserves nos restaurantes va a más, con un 45% afectáu. "Ye un seriu inconveniente que xenera perdes y enzanca la xestión de los establecimientos", alvierte la patronal.

"Cola ayuda del Gobiernu del Principáu d'Asturies"