¿Cómo ta Asturies nel ranking de porcentaxe de titulaos en Secundaria ? Meyor imposible

Bonos resultaos académicos y una mayor inversión por parte del Principáu. Eses son les dos conclusiones que se saquen del informe "Estáu y situación del sistema educativu asturianu 2022-2023", ellaboráu pol Conseyu Escolar y presentáu va unos díes n'Uviéu. Según esos datos, Asturies encabeza'l ranking nacional de titulaos en Secundaria, con un 87,3 por cientu de la población que por edá pudo cursar estos estudios, y ocupa la tercer posición en Bachilleratu, con un 62,8 por cientu. "Nesi primer puestu tienen enforma que ver los profesores y ye importante insistir nel so trabayu y los resultaos", señaló esti día la conseyera d'Educación, Lydia Espina.

Tou ello metanes un claru descensu d'estudiantes: 2.329 menos nos trés últimos años. Cosa que, a güeyos d'Espina, podría remediase cola llegada de la rede 0-3 años. "El proyeutu de les escuelines tien ente los sos oxetivos afitar y atraer población hacia les zones rurales, ufiertar igualdá d'oportunidaes y facilitar la conciliación familiar", señaló.

Sicasí, esta cayía na natalidá y, arriendes d'ello, nes matrícules escolares, nun torga que la Conseyería d'Educación aumente la inversión. L'informe asitia a Asturies na cuarta posición nacional tocantes a gastu públicu por alumnu, con 8.140 euros na enseñanza pública -1.097 euros más que la media nacional- con un gastu total de 780 millones. Ún de los "compromisos firmes del gobiernu asturianu", tal que sorrayaron esti día dende la Conseyería. El documentu "Ye una radiografía percompleta, frutu del enorme trabayu d'escoyeta y analís que fexo'l Conseyu Escolar del Principáu", felicitóse la Conseyera.

Una de les novedaes del informe ye la inclusión del porcentaxe d'alumnáu qu'escueye l'asignatura optativa d'asturianu y eonaviego. En Primaria -onde les optatives son Asturianu o Cultura Asturiana- escuéyenla, na enseñanza pública, el 48,1 por cientu y cuasi'l 42 por cientu respeutivamente. Mentanto qu'en Secundaria, onde s'abre l'abanicu d'optatives pudiendo escoyer ente Asturianu, Francés y Comunicación verbal y TIC, los datos baxen hasta'l 15,2 por cientu pal asturianu y el 13 por cientu pal eonaviego. Amás, ye la primer vegada qu'esti documentu se presenta tanto en castellán como n'asturianu, daqué que Lydia Escayu agradeció: "un xestu qu'enllaza con toles midíes que tamos adoptando na conseyería pa la promoción y usu de les nueses llingües autóctones". 

Propuestes de meyora

L'informe conclúi con una serie de propuestes de meyora n'aspeutos como les condiciones llaborales del profesoráu. Nesti sentíu, dende el sindicatu UXT, insisten en que: "Apura abrir un procesu de negociación coles organizaciones sindicales pa encarar cuestiones como la homologación salarial, l'amenorgamientu de la carga lectiva y l'amenorgamientu de ratio d'alumnáu". 

El documentu tamién fala de meyorar l'atención a la diversidá ya inclusión, la orientación educativa o la descentralización de la ufierta formativa nos centros d'adultos. Según esplicó la conseyera, dalgunes d'estes midíes yá tán entamaes, como los decretos d'equidad y coeducación, les iniciatives de promoción del asturianu o l'alcuerdu pa la meyora de la calidá de la enseñanza pública.

"Cola ayuda del Gobiernu del Principáu d'Asturies"