Estos son los nuevos residentes de Llaboral Centru d'Arte (y estos son los sos proyeutos): del soníu a les teles

Un proyeutu sonoru con una puesta n'escena curiosa y acoricada alredor de xuegos de lluces. Una investigación, inspirada na planta primixenia "Urpflanze", que busca la unidá de la naturaleza . O un proyeutu audiovisual colos conseyos rescataos del güelu Joaquín Iglesias. Son dellos de los trabayos que van desenvolver hasta xunetu los seis nuevos artistes residentes de Llaboral Centru d'Arte. 

L'artista plástica uvieína Paula Blanco va trabayar en "Urpflanze", que toma de referencia esa planta primixenia, que'l poeta Goethe creía qu'esistía, y que s'obsesionó en buscar, porque "contendría a toles plantes". Por eso reparará en dellos tipos de plantes, pa crear una serie de pieces de gran y mediu formatu, "per aciu d'estructures metáliques, p'asemeyar esa planta primixenia astrauta", cuenta Blanco.

El llangreanu Alejandro Rodríguez "Kresy", con más de dos décades de carrera musical, ta somorguiáu agora nel so proyeutu "Ciudá Naranco", un grupu musical que nació nel so estudiu de grabación, de música electrónica, y qu'agora quier afitar. "Quiero aprovechar pa trescender acullá del grupu tradicional, con visuales temátiques, que dialoguen en cada cantar, con una puesta n'escena más curiosa y trabayada, con lluces y visuales", rescampla. "Tratamos temes actuales, de forma narrativa y esplícita nunos casos, y n'otros más simbólicos y conceptuales, llegando cuasi a un puntu subliminal", analiza.

Nel casu de Covadonga Casado, con "Te quiero verde", muévese con gres y magre d'alta temperatura. "Ello ye una investigación práutica, sobre cómo facer espolletar la vexetación sobre la superficie d'escultura cocida", comenta, primero d'amestar: "Gústame cómo poner esi contraste no artificial y lo natural, esa yuxtaposición qu'esiste ente la durez del gres, la escultura cocío, y un pocu la fraxilidá de la vexetación y organismos vivos".

Ente lo analóxico y lo dixital

Cristina Busto, avilesina, col proyeutu "Omega ville", trabaya nes intersecciones de lo analóxico y lo dixital. "La idea ye trabayar dispositivos, que xeneren imaxe, d'una forma analóxica al traviés de la plástica o equipos antiguos analóxicos", describe. "Vamos desarrollalo con esos dispositivos colos que xenerar imaxe, con teatru de solombres o maquetes. Y vamos falar un poco de la esclavitú o l'holocaustu modernu, porque tien un tresfondu políticu la obra", destaca sobre esa final que va desenvolver xunto a Marta Blanco y Luján Marcos. 

La memoria, alcordanza y conseyos del so güelu Joaquín Iglesias, conocíu n'Uviéu y na Fábrica de Trubia, enllenen el curtiumetraxe que prepara María Ortiz, en "Consejos del mi güelu", un viaxe poéticu pa cavilgar sobre la vida y la conexón colos raigaños. "Lo que voi facer va ser coyer unes cintes en VHS que tenía mio güelu grabaes, de 15 años, voi escoyer distintos ‘frames’ y voi facer un diálogu internu colos conseyos que me treslladó", recalca. 

Y Covadonga Pérez, conocida artísticamente como "Orba.yu", con "Vibraciones sonores" va crear una instalación táctil interactiva. "Voi crear pieces testiles, tipu tapices o alfombres, y el públicu al tocar eses pieces el soníu amplifícase", fae. "Quiero que la xente quite esi mieu a tocar obres", amesta sobre esta propuesta que pescancia la relación ente'l tactu y el soníu.

"Cola ayuda del Gobiernu del Principáu d'Asturies"