El golpe de los tresllaos d'Arcelor a India: ente 130 y 150 empleos n'España (y la mayoría n'Asturies)

El plan de tresllaos d'ArcelorMittal a la India va afectar a ente 130 y 150 puestos de trabayu n'España, la mayoría n'Asturies. El comité européu de la multinacional, axuntáu esti día en Luxemburgu, denunció la "falta d'información y tresparencia" d'esta operación que va suponer el treslláu de cerca de 1.400 puestos de trabayu n'Europa pa menguar costos énte la crisis del aceru.

La multinacional siderúrxica anunció'l febreru pasáu un plan de centralización de servicios (finances, recursos humanos, compres, informática…) n'India que tendrá de ser concretáu definitivamente por un estudiu que se ta realizando nos países europeos afectaos y en caúna de les sos plantes. Sicasí, yá hai estimaciones d'impactu. El plan va afectar al 30% de la plantía actual de servicios de sofitu. N'España van ser ente 130 y 150 puestos, la mayoría n'Asturies. Estos recortes van axuntase a los que se tán tratando nel área de producción. Namás na acería de Xixón yá se plantega l'amortización de 70 empleos cola reorganización llaboral que va acompañar a la puesta en serviciu del nuevu fornu híbridu d'arcu eléctricu.

El comité d'empresa européu d'Arcelor denunció va unos díes la falta d'información y de tresparencia sobre los tresllaos a India, "que nos quita de la información más elemental pa poder pronuncianos con fundamentu sobre la racionalidá d'esti proyeutu". El comité destacó que la direición de la empresa nun facilitó datos sobre costos y ventayes. "Tampoco presentó nengún analís seriu de los riesgos inherentes al treslláu d'estos servicios nin del impactu nel desenvolvimientu de la producción europea, que podría vese gravemente afectada pol alloñamientu de funciones de sofitu fundamentales pa la nuesa actividá productiva", señaló'l comité, qu'amestó que l'únicu argumentu comercial remanáu hasta agora ye la diferencia de salarios ente Europa y la India, "lo que constitúi un exerciciu de cinismu de parte de la direición, que diz defender valores como la salú y la seguridá, el respetu del mediu ambiente y les meyores práutiques en materia de desenvolvimientu personal y profesional".

El comité tarrez qu'a esti treslláu de servicios-y siga un progresivu esaniciu de capacidaes de producción n'Europa y critica que, per una llau, "la direición de la compañía reclame a les autoridaes europees ayudes económiques cada vez más descomanaes y, per otru, presenta un proyeutu de deslocalización que, a lo último, podría suponer la perda de cientos de puestos de trabayu n'Europa".

Mentanto'l comité aconceyaba en Luxemburgu, el CEO d'ArcelorMittal n'Europa, Geert van Poelvoorde, visitaba Asturies p'asistir a un alcuentru internu de direutivos de la multinacional. Van Poelvoorde aprovechó la so estancia pa visitar les instalaciones siderúrxiques de Xixón y Avilés y conocer sobre'l terrén los proyeutos de descarbonización que tán entamaos, como'l fornu eléctricu de Xixón, ya inclusive los que tán en suspensu, como la planta DRI.

"Cola ayuda del Gobiernu del Principáu d'Asturies"

Suscríbete para seguir leyendo