Asturies rexistra un déficit comercial de 75 millones nel primer trimestre del añu

Les esportaciones d'Asturies baxaron nel primer trimestre del añu un 6,9% interañal, hasta 1.321 millones d'euros, mentanto que les importaciones aumentaron un 18,2%, hasta 1.396,1 millones, acordies colos datos publicaos esti día pol Ministeriu d'Economía, Comerciu y Empresa. El mayor volume de les importaciones fixo qu'Asturies zarrara'l trimestre con un déficit comercial de 75,3 millones d'euros, en contraste col superávit de 238,4 millones del mesmu periodu del añu pasáu. 

Cerca de la metá de les esportaciones d'Asturies correspuenden a un únicu sector, el de les semifactures non químiques. Nesti sector les esportaciones tuvieron un valor de 625,9 millones d'euros, el 47,4% del total. A muncha distancia asítiase como segundu sector con mayor pesu nes esportaciones el de bienes d'equipu, con 199,9 millones d'euros que representen el 15,1% de les ventes de les empreses asturianes nel esterior. Y en tercer llugar asitien les materies primes, con un valor de 128,4 millones que representa'l 9,7% del total. 

Nel conxuntu del país, el déficit comercial asitió nel primer trimestre del añu en 15.099,6 millones, un 86,3 % más que nel mesmu periodu de 2024 (8.105,1 millones), nun contestu global de tensión comercial y aumentu de les importaciones. Les esportaciones españoles axuntaron 95.873 millones d'euros ente xineru y marzu, un 2,6% más; mentanto que les importaciones xubieron a 110.973 millones, un 9,3% más. El detalle de los datos amuesa que, detrás d'esti aumentu de les importaciones, tán les mayores compres de confección, aparatos eléctricos y buques a China y de melecines y gas a Estaos Xuníos.

"Cola ayuda del Gobiernu del Principáu d'Asturies"