L'autora uvieína María Dillon gana'l I Premiu "Leer suma"

La escritora uvieína María Dillon López, de 29 años cumplíos de recién, va pasar a la historia como la primer ganadora del premiu de novela moza "Leer suma" convocáu pola Fundación José Manuel Lara cola voluntá d'afayar y sofitar a los nuevos talentos de la narrativa xuvenil.

"Una distopía llixera, adictiva y orixinal, con persones qu'abracen la diversidá y un fondu reflexivu que recueye moliciones bien actuales". Asina define'l xuráu la obra "Cuello de botella". 

Dillon, que trabaya como periodista en Radio Nacional d'España en Madrid, confesaba esti día a esti diariu que foi "inesperao". Taba nun cursu y nun podía garrar llamaes, cuando sentí'l títulu del mio llibru al asoleyase'l fallu foi increíble". Ye'l primer certame al que se presenta, y ve "perimportante esti tipu de premios sobre lliteratura xuvenil, la puerta d'entrada de los llectores. Siempre quixi ser escritora, y yá de neña escribía llibros anque nun los terminaba..." D'aquella guaja de diez años a la muyer que güei disfruta del so primer ésitu lliterariu –precedíu del silenciu de delles editoriales a les qu'unvió'l manuscritu– hai un mundu de munches llectures. "Lleo munches coses distintes. Gústame muncho Kurt Vonnnegut, y tamién un llibru d'una autora española, Marta Sanz, "Persianas metálicas bajan de golpe", que me sirvió enforma. Y ye que pienso que nun hai que lleer ciencia-ficción namás, anque'l mio llibru lo seya. Apriéndese muncho lleendo a otros escritores".

El periodismu ye mui útil: "La desinformación ye güei mui distópica, por desgracia. Hai grana a la que depués pones imaxinación y crees un mundu que se terminó tal como lu conocemos, una sociedá mui controlada... Trato asuntos medioambientales, d'emigración... Muncha actualidá, anque nun escenariu distópicu llonxanu. Una de les coses que más me costó foi escoyer el títulu y saquelu d'un teletipu. Prestóme esa espresión. Como periodista apriendo coses que me lleven a escenarios imaxinativos".

Hai nel so estilu una influencia de Ray Bradbury –autor visionariu qu'imaxinó un mundu de cancelaciones onde quemen llibros–, coles sos frases llargues y una modulación poética: "Quiero ser fiel al mio estilu". La so novela trescurre nuna Tierra "mui desemeyada a la que conocemos, onde en teoría yá nun hai más qu'un territoriu. Y nin los bonos son tan bonos nin los malos son tan malos".

"Cola ayuda del Gobiernu del Principáu d'Asturies"