L'ampliación del Muséu Belles Artes asoleya otra vuelta l'Uviéu medieval

Les obres de la segunda fase de l'ampliación del Muséu de Belles Artes d'Asturies, nel solar anexu al Palaciu de Velarde, volvieron asoleyar l'Uviéu medieval. Depués de que se valtara l'edificiu esistente, primer fase de los trabayos, agora acaben d'empezar les cates arqueolóxiques y con elles volvió aprucir la buelga de l'antigua configuración de la ciudá. Fontes próximes al proyeutu espliquen que los trabayos nun lleven más d'una selmana y que se van allargar cuatro o cinco meses, anque pel momentu nun atoparon "nengún afayu conseñable".

L'aspeutu que presenta pa curiosos y vecinos llama, sicasí, l'atención. Ellí pueden identificase murios y traces de lo que foi l'antigua configuración de la ciudá. La escavación que puede vese estos díes, cola direición d'Alfonso Menéndez, ye conocida polos arqueólogos, porque ello ye la continuación del terrén yá escaváu y analizáu con detalle a lo llargo de les obres de la primer fase de l'ampliación del muséu. 

Daquella, nunos trabayos que dirixió Rogelio Estrada, les cates lleváronse, precisamente, hasta la llende del edificiu qu'agora se valtó, y nun s'escavó más pa nun poner en riesgu la estructura del inmueble. Ellí pudo vese, como se ve agora, qu'había una necrópolis baxomedieval que se correspondería col campusantu de Santiso. 

Eso esplica, posiblemente, lo que nes fotografíes de los trabayos que s'entamaron esta selmana abulten ser restos de güesos. Ello ye que los vecinos de la redolada de la Catedral llegaron a fantasiar la pasada fin de selmana, énte l'apaición d'un fémur que resultó ser propiedá d'un médicu al que-y cayera del balcón, cola posibilidá de qu'una gavilueta pasara peles obres del Belles Artes y dexara aquel güesu na plaza. 

Del vieyu campusantu caltiénense hasta les muries, y en tola zona pueden rastrexase les buelgues de lo que foi aquel Uviéu, con una morfoloxía urbana bien distinta a la que se conoz agora. Amás de que la plaza de la Catedral nun tenía la dimensión que tien agora, había otra comunicación, güei sumida, entre lo qu'anguaño ye esa zona y la cai de San Antonio, esto ye, otra exa paralela a la de Rúa y Santa Ana, asitiada entrambos les dos. 

La previsión nes cates que se desarrollen a lo llargo de les selmanes que vienen, al marxe de l'apaición de restos relevantes, pasa por atopar muncha cerámica altomedieval, lo mesmo qu'asocede en tola zona vieya, como nel solar vecín del Martiellu de Santana onde tamién se tán realizando cates o les buelgues de furacos de poste tan frecuentes nestos niveles del Uviéu Antiguu.

Queda por ver si a lo llargo de les próximes selmanes los trabayos dexen detectar afayos de mayor caláu, como pasó a lo llargo de la primer fase de l'ampliación. Naquelles cates foi nes que s'atopó la Fonte de la Rúa, equipamientu romanu, güei visible detrás d'un cristal a la entrada del Belles Artes, y que permitió xenerar nueves hipótesis sobre esi pasáu romanu de la ciudá tantes vegaes n'alderique entre historiadores y arqueólogos.

"Cola ayuda del Gobiernu del Principáu d'Asturies"