Asturies, segunda comunidá con mayor resquiebra salarial ente xéneros

Asturies ye la segunda comunidá autónoma onde, de media, los homes cobren más que les muyeres. En concretu, 6.225,1 euros más. Asina lo indiquen los datos de la Encuesta Añal d'Estructura Salarial correspondientes a 2023 (últimu añu con datos completos), que va unos díes publicó l'Institutu Nacional d'Estadística (INE).

La encuesta indica que'l salariu brutu mediu añal d'Asturies xubió en 2023 a los 27.916,60 euros, la quinta mayor cifra ente les comunidaes autónomes, namás per detrás de los salarios medios del País Vascu (33.504,92), Madrid (32.219,60), Navarra (31.199,66) y Cataluña (29.978,69), anque per debaxo de la media nacional, asitiada en 28.049,94 euros.

N'Asturies, la nómina media avanzó en 2023 un 4,3% al respeutive del añu anterior, incrementu mayor por poco que l'esperimentáu a nivel nacional, del 4,1%. En dambos casos, l'aumentu de los salarios tuvo perriba del de la inflación: del 2,9% nel casu asturianu y del 3,5% en toa España.

Al respeutive de la diferencia ente sexos, los asturianos varones cobraron de media 31.033,72 euros (un 4,9% más qu'un añu primero), mentanto que les muyeres percibieron 24.808,62 (una meyora menor nel so casu, del 4,2%). Esto ye, la resquiebra de xéneru na comunidá foi de 6.225,1 euros, la segunda mayor fendedura salarial de xéneru nel país, namás per detrás de la de Navarra, de 7.161 euros. Percima de la fendedura media nacional (4.781) figuren Madrid (5.802), Aragón (5.664,17), Cataluña (5.480,6), Cantabria (5.418,6) y Murcia (5.324,4).

Resquiebra en mínimos

A nivel nacional, la ganancia media de les muyeres foi de 25.591 euros (el 5,1% más) y la de los homes de 30.372 (el 3,4 % más), lo que fai menguar la resquiebra salarial al 15,7 %, un nuevu mínimu na serie histórica del INE. 

Na so nota esplicativa, l'organismu señaló que, na fendedura de xéneru, amás del sueldu en sí hai que tener en cuenta otres variables llaborales como'l tipu de contratu, de xornada, ocupación o l'antigüedá, qu'inciden de forma importante nel salariu.

L'actividá económica que presentó'l mayor salariu mediu añal en 2023 foi'l suministru d'enerxía eléctrica, gas, vapor y aire acondicionáu, con 54.447,96 euros por trabayador, una cifra un 94,1 % superior a la media nacional; siguida de les actividaes financieres y de seguros, con 48.922,80 euros.

Otra manera, la hostelería y los otros servicios tuvieron los menores salarios, con 16.985,78 y 19.751,59 euros, respeutivamente, cifres que son un 39,4% y un 29,6% inferiores a la media.

"Cola ayuda del Gobiernu del Principáu d'Asturies"