Una pequeña flota motorizada atraca en Lluanco: "Ye daqué curioso, estelante y simpático"

Mediu centenar de maquetes de barcu, feches en lata, decoren dende va unos díes la sala d'esposiciones del Muséu Marítimu d'Asturies, en Lluanco. Ello ye que son parte de l'amuesa "Barcos de hojalata", una obra realizada polos hermanos Luis y Nicolás Batalla, naturales de Tazones, dos artesanos apasionaos de los barcos que dedicaron un llargu tiempu pa crear estes "obres d'inxeniería" que van poder visitase nel Muséu hasta'l 28 de xunu. Amás, los martes, xueves y sábados, dambos dos autores van allegar a la instalación lluanquina n'horariu de 12.00 a 14.00 y de 17.00 a 19.00 hores pa realizar demostraciones en vivu de los modelos propulsaos.

"Ye daqué percurioso, estelante y simpático", declaró'l direutor del Muséu, José Ramón García, depués de la presentación de la esposición, sobre la que destacó que "tán a mediu camín ente la maqueta y el xuguete" y que "tienen la gracia de que son mui espresivos gracies al so gran coloríu". Nesi sen, García esplicó que, amás de la demostración, los autores de les pieces van esplicar en detalle'l funcionamientu de les maquetes. "L'interés ta aseguráu", amestó García, que concretó qu'ún de los artesanos foi maquinista de barcos, amás de ser dambos "unos curiosos".

D'ente'l mediu centenar de maquetes de barcu que dende esti día se pueden visitar nel Muséu luanquín, rescamplen delles pieces inédites que los hermanos Batalla fueron realizando nos últimos tiempos. Munches de les pieces, señaló'l direutor de la instalación cultural, tienen motores qu'asonsañen la propulsión por esplosión, mentanto qu'otros van equipaos con simuladores de máquines de vapor, como tamién con mecanismos de reloxería pa variar la so potencia. "Cuando se ponen a funcionar quedes plasmáu", reconoció García, quien confesó que yá viera en primer persona les pieces qu'agora s'enseñen nel Muséu y que, magar ello, quedó "esteláu" cuando vio los barcos inéditos. 

"Son mui fotoxénicos, toos ellos. Tienen colores mui llamativos y con una gran presencia", recalcó'l direutor del Muséu sobre'l mediu centenar de pieces úniques. "Nun hai dos iguales", fexo García.

"Son unes pieces espectaculares, unes obres de la inxeniería", amestó'l responsable del complexu, que recalcó que cada pieza ye especial y carauterística: barcos con remeros, chimenees, cigoñales, pistones... Too ello utilizando l'alcohol como combustible p'aumentar el realismu cuando s'activen.

Amás, García señaló qu'esta esposición va ser una gran oportunidá pa siguir atrayendo al públicu más mozu, aprovechando l'interés de les pieces y les demostraciones en vivu del so funcionamientu. "Tamos avezaos a les pantalles, pero ver y escuchar el ruiu que xeneren cuando les activen ye daqué perprestoso y sorprendente", remató García.

"Cola ayuda del Gobiernu del Principáu d'Asturies"