Xunta ente l'Academia de la Llingua y el Gobiernu asturianu p'afitar compromisos en política llingüística

Pela izquierda, David Guardado, Adrián Barbón, Xosé Antón González Riaño y Vanessa Gutiérrez.

Pela izquierda, David Guardado, Adrián Barbón, Xosé Antón González Riaño y Vanessa Gutiérrez. / ALLA

S. C.

L'Academia de la Llingua Asturiana (ALLA) aconceyó va unos díes col Gobiernu asturianu pa tratar la política llingüística que se quier desendolcar nos dos años vinientes de la llexislatura y enantes de les eleiciones autonómiques de 2027.

La xunta celebróse na Presidencia del Principáu y acudieron el presidente, Adrián Barbón, la conseyera de Cultura, Política Llingüística y Deporte, Vanessa Gutiérrez, y el vicepresidente de l'Academia, David Guardado.

Na reunión l'ALLA plantegó varies iniciatives, ente elles, la presentación urxente y entamu d'una estratexa sistemática pa dignificar l'asturianu y l'eonaviegu na vida pública, social, académica y cultural d'Asturies.

Tamién se charró sobre l'axilización del Mandatu-Marcu y del Contratu-Programa en rellación col usu del asturianu na RTPA. L'Academia reclamó la creación d'una Direición de Conteníos en Llingua Asturiana, plantegamientu que'l gobiernu comparte.

Amás, tratóse l'adaptación de la Llei d'Usu del Asturianu, de 1998, calteniendo la base refrendada pol Tribunal Constitucional. La propuesta de l'Academia prioriza'l so desarrollu reglamentariu pa facer la llei efeutiva dafechu, reservando les posibles modificaciones o axustes pa correición d'errores o cuestiones estrictamente téuniques, como la denominación oficial "asturianu" en cuenta de "bable/asturianu" o "eonaviegu" en cuenta de "gallego/asturianu".

Falóse tamién de la consideración prioritaria del asturianu n'otros ámbitos como los planes institucionales de potenciación y desarrollu de la Intelixencia Artificial (IA). El gobiernu informó qu'esta cuestión apaez nel documentu de planificación de midíes de política llingüística apurríu y l'Academia ofrecióse a compartir la so esperiencia na materia.

N'últimu llugar, viéronse medíes pa meyorar la escolarización del asturianu y del eonaviegu, incluyendo el seguimientu d'asistencia voluntaria a les aules y la ellaboración de materiales curriculares axustaos a la LOMLOE y a los decretos del Principáu. El gobiernu valoró positivamente estes propuestes y transmitió'l so compromisu cola especialidá docente pal profesoráu.

"Cola ayuda del Gobiernu del Principáu d'Asturies"

Tracking Pixel Contents