Nesti tiempu de pandemia, dediquéme a esqueirar pola casa, a abrir los caxones que cuantayá taben zarraos, a revolver nos armarios y a remirar con señardá la ropa d’antaño. Hasta alcontré “tesoros” que nun m’alcordaba que guardara. Esos tesoros, que lo son anque nun tengan valor material, tienen valor sentimental que ye pa nós lo más grande. Atopé cartes, postales, fotos, notes, flores seques, figures, pañuelos, “pongos”... y alcontréte a ti, que cuantayá que m’olvidare qu’esistíes. Revolver nos caxones fíxome una vez más a repasar la mio vida. Los caxones lleváronme otra vuelta al pasáu, a revolver nel maxín y a visualizar como nun flax les coses que fui perdiendo pero que tán guardaes nellos a bon recáu, anque nun seyan visibles.
Tantos oxetos axunté que dempués de “contemplalos”, la señardá llevóme a abrir el caxón de les emociones. Nel afayé’l diariu del mio corazón, escrito con un bolígrafu indeleble, que nun se borra enxamás, enllenu de feches memorables, feches de bonos y de malos momentos. Nesi diariu tengo anotaes situaciones, vivencies, momentos, instantes y amores. Ellí ta escrito con mayúscules el nome de tolos caxones que tán nel armariu del mio corazón, onde tas tu, ella, él, los mios seres más queríos, ellí tais toos encuruxadinos, y abrigaos, toos vivos, anque dalgunos yá se fueren d’esti mundu. Y una vez más tresforméme y volvíme pequeñina, diminuta, pa poder zarrame con vos, como faigo, a menudu. Abrí la puerta d’esi requexu emocional y entré en cada caxón a repartir abrazos y besos y amor. Nesti armariu del corazón nada ta apoliyao, porque lo tengo protexíu con naftalina amorosa, y nél entro cada poco a respirar los sos arumes.
Recuerdo d’esti vayíu emocional y entamo otra vez a entreteneme n’abrir los caxones de los otros armarios de la “mio casa”. Y siguí afayando tesoros. Un caxón apináu de sueños, otru de mimos, otru cola tristura, otru coles ausencies; el caxón del vacíu, el de los secretos; n’otru alcontré l’allegría, n’otru la la lluz y n’otru la escuridá, n’otru ta l’amor, n’otru l’amistá, n’otru la esperanza, n’otru l’ánimu, n’otru la soledá... Y entamé a acariñar toles ayalgues. Una llárima rasóme los güeyos. Y ensin más zarré de nuevo los mios caxones y sellélos con señardá. Seique son los únicos que tengo ordenaos.
