Son nidios los recuerdos cuando facemos balance del añu que terminó. Nestos tiempos de tantu agobiu too se nos vuelve rebobinar hacia’l pasáu y dámonos cuenta cómo vamos perdiendo a cada instante too lo que vivimos. Oxalá podamos escaecer los malos momentos d’esta pandemia que nos afara. Nos dos últimos años peslláronse dafechu les puertes de la llibertá. Magar que tuviéremos convencíos de que yéremos llibres, esa puerta namás ta entreabierta y cada poco zárrase de güelpe ante cualquier vendaval de la vida. El vendaval llegó esta vez con fuercia de furacán, y amás zarrónos en casa col mieu y la impotencia, el desespero y la incertidume.
Ye angustiosu esti balance de dos años de pandemia. Hai veces que queremos desaniciar el pasáu. Dende que llegó el COVID el tiempu nun trescurrió de la mesma manera. Por veces, si me paro a pensar, alcuéntrome con una rara sensación, nun soi a asitiar los acontecimientos d’estos dos últimos años, porque foi tiempu perdíu, como si nun lu viviéremos. Vivimos pendientes de les noticies, que non siempre fueron nin son fiables, metíos en casa, como nunca nos pasara, pendientes de que llegase la vacuna y siempre pidiendo que nun tocare la mala suerte de garrar el malditu virus. Suspendiéronse actos, visites familiares y d’amistaes, fiestes y espectáculos. Pasamos ganes de divertinos, d’axuntanos cola familia, d’abrazanos... Tuviemos sí, que cambiar los hábitos de rellación, y tenemos que facer frente a la soledá , l’agotamientu, y la impaciencia. Pienso que dos años perdíos en cualquier edá son muncha perda, y a los que yá vamos cuesta abaxo, procurando apuranos a vivir el presente, perder dos años col mieu nos güesos y metíos en casa, ye mui doliosu. Y muncho más porque al nuesu alredor hubo llaceries y muertes que nos encoyeron el corazón.
Otres consecuencies de la maldita pandemia agravaron enforma la situación. Pesllaron munches empreses y numberoses families viéronse de sópitu rozando la probeza. Resintióse’l sector de la cultura, la hostelería, el turismu y otros más, que sufrieron un parón del que van tardar en recuperase.
Llegó por suerte la vacuna, pero’l virus sigue’l so camín mutando y atacando fuerte. Pensábemos xuntanos pa despidir l’añu y tábemos convencíos de que col 2021 despidiríemos la pandemia, pero l’añu 2022 entamó de mala manera, colos contaxos disparaos. La tensión y el mieu sigue con nós. Estos dos años nun nos alcontramos a gusto nin tranquilos en nengún llugar, guardando les distancies, y mirando a los que se nos acercaben ensin el mázcaru. Dalgunos fuimos llibrando, otros pagaron cola vida. Y agora vista la situación d’espardimientu de la nueva cepa Ómicron, otra vuelta se nos frayaron les esperances. Como se diz popularmente “bien guiáu vaya’l 2021” que nos abrasó con esta situación llaceriosa y con otres que sufrieron en distintos puntos del Planeta, la más cercana, el desastre de la Palma, a los que-yos deseamos que repongan fuerces y se-yos solucione la vida a la mayor brevedá, que les ayudes lleguen darréu a los que tanto lo necesiten.
Dame pena entamar l’añu contando nesti balance coses tán tristes. A ver si esti añu nos dexa vivir dalgo de felicidá. Asina vos lo deséu. Feliz 2022.
