L’odiu por bandera

Yá van delles veces que la TPA s’avera al mio pueblu, Chanos de Somerón, esi que se ve dende'l mirador de Payares. Como ye famosu polos sos arbeyos, que dicen que comíen los zares de Rusia, n’una ocasión, mio madre presentó en "Conexión Asturies" la receta del Pitu de caleya con arbeyos, desvelando'l secretu de la cocción de les llegumes dientro d'una fardela pa que nun s'espelleyen.

Les sos esplicaciones fueron en correctu castellanu, porque ella ponse bien fina cuando fala con xente que nun ye del valle, pero claro, lo que nun diz ye ‘Pollo de calle con guisantes’, nin atopa palabra equivalente pa les que solo conoz n’asturianu. Igual qu'ella tamos la mayoría d'asturianos y asturianes qu'entemecemos el castellán col asturianu en proporciones distintes. Si'l periodista de la TPA dixera "y eso del Pitu que cosa es" por casu, paeciérame abondo estrañu y poco apropiáu pa una televisión asturiana. Como ye d'esperar nun lo fixo y la entrevista fluyó de manera natural. Cualquier persona que piense un poco va entender que pal desempeñu del oficiu periodísticu vien bien conocer aquello sobre lo que trabayes. Si t’especialices nel campu de la economía taría bien que supieres lo que ye'l PIB o l'IPC, si lo vas facer sobre'l deportivu tendríes de saber cuales son les regles de dellos deportes.

Si vas trabayar nuna radio o televisión asturiana tendrás de conocer mínimamente los elementos culturales que faen qu'esista daqué que llamamos Asturies. En fin, creo qu'esto qu'escribo son coses de sentíu común y por esa razón na selección de personal de la mayoría d'oficios suel incorporase eso que llamamos ‘méritos’ pa valorar esa formación qu'anque nun ye imprescindible sí dexa resolver determinaes situaciones del oficiu.

Pero lo del sentíu común nun va con Vox. Esisten gracies a qu'hai xente que nun usa la so capacidá de razonamientu y déxase llevar por instintos primarios.

El grupu parlamentariu de Vox de la Xunta lleva a los tribunales que la RTPA incorpore como méritu na selección de personal la conocencia de la llingua asturiana. Según Vox esto supón "conceder una serie de privilegios para que aquellos que son de la cuerda favorable a la oficialidad tomen al asalto las empresas públicas asturianas y la administración pública asturiana". Fálta-yos añader que namás tomáu al asaltu'l poder gracies a la llingua asturiana darréu vendrá proclamar la república soviética, quemar les ilesies y espropiar les propiedaes de la xente de bien. Nun lo dicen pero dalgunos de los siguidores ye lo que piensen y tienen mieu y por eso tán llenos d'odiu. Eso crean los del fachaleco y apellíos compuestos, odiu ente los probes que se comen les sos mentires. Meyor sería que comieren Pitu de caleya

Suscríbete para seguir leyendo