Opinión | Filazón
La víspora
El día anterior de cualquier celebración vívese con muncha intensidá y trabayu
Entama setiembre y tamos a puntu de despidir el branu. Un branu festivu onde n’Asturies tenemos romeríes y celebraciones per auquier. Escribí munches veces sobre lo que la fiesta significa pa los participantes, pero nunca escribí sobre la víspora. El día anterior a cualquier celebración tien un aquel especial: trabayu, emoción, impaciencia, preparativos, reflexón y esmolición nesi día que ye l’antoxana de la fiesta.
Si faigo memoria, la víspora de una fiesta o d’otru acontecimientu, siempre foi y ye una oportunidá pa rellacionase y afitar llazos. Ye un día de preparación y tamién de preocupación por que too tea a puntu y de que too salga bien. Esquero na memoria y voi p’atrás nel tiempu hasta la infancia y la mocedá.
Veo a mi madre mui apurada preparando la comida y la casa. Inda paez que me güel a pitu y a coneyu guisáu pa rellenar aquelles empanaes riquísimes. Ella amasaba con xeitu y amor y esmerábase pa que to saliera bien. Mi güela arroxaba’l fornu y allí cocíen les empanaes, el pan, el rapón y el bizcochu. Un bizcochón tan grande como la rueda’l carru y que como nun había robots, llevabais abondo tiempu batilu y cuidar que quedare esponxosu. Dempués d’enfornar, unos rezares que dirixía mio güela pa que la fornada saliera bien y pa que Dios nos diera siempre pan que comer.
Sábenme los recuerdos a los filetes empanaos que yeren manxar pa los díes de fiesta; y llacón y chorizos, y frixuelos, y como entrante, pan con mantega con miel. Too quedaba preparao la víspora.
La casa golía a fiesta y esperábamos con gran ilusión que llegare’l día. Y "veo" a mio padre con fexes de yerba al llombu pa tener, en parte, llibre de llabor el día festivu. Too recoyío y llimpio pa cuando llegaren los familiares y amigos. Nun escaeceré nunca esos momentos nos que nos sentábemos toos alredor del mantel. Y ye qu’en mio casa siempre veníen munches persones "de sopas". Ellos teníen bona cuenta de que nun faltare naide a la mesa. Los mios pas gozaben con tener la casa llena nos díes señalaos, y a mi tresmitiéronme esi deséu de celebrar colos de mio les fiestes y feches importantes y vivir, anque con menos trabayu, la emoción de la víspora. Pero nun se me llogra siempre que quiero.
Magar qu’heredé la satisfaición que me produz tener amigos y familia alredor del mio mantel, los más cercanos casi nunca tán nesos momentos importantes. Lo mios fíos emigraron, volaron, como les andolines, y nun sé si-yos tresmití el golor a empanada, anque siempre la cociné. Los míos tán lloñe d’esti mio llar, y poques veces puedo revivir aquellos momentos tan emotivos y prestosos, que tanto echo en falta. Nin tampoco la ilusión de la víspora cuando llegaben a casa los invitaos más allegaos y hasta teníamos que dormir travesaos nes cames.
¡Cuánto se disfruta coles pequeñes coses! Emociónome recordando lo felices que nos facía ofrecer lo que teníamos, sobre too cariñu y abrigu. Duelme cuando hai una celebración y nun puedo tener la compañía de los que más quiero na mio mesa. El tiempu pasa a galmiaes y van perdiéndose esos momentos de convivencia cercana y amorosa; vamos perdiendo compartir allegríes y penes, que se lleven meyor abrigaos polos abrazos.
Y nesi correr del tiempu hasta nos amaga la soledá. Por veces, consuélome pensando nestos momentos entrañables colos de mio, que yá se fueron a otra dimensión. Agora too ye distinto. Suaño y fabulo con poder, otra vuelta, celebrar la víspora cola ilusión d’antaño, anque nun tenga qu’arroxar el fornu, y asina poder axuntar los míos alredor de la mesa el día la fiesta, o n’otros díes señalaos, como cumpleaños, santos y demás efemérides. Ello porque na mio casa siempre se celebraron. Espero que se me cumplan los suaños.
Suscríbete para seguir leyendo
- Esperpéntico suceso en Avilés: denuncian a una madre por vejar a su hijo, menor, en un bar
- La historia de la recuperación del cáncer de Sergio Peris Mencheta (la cuenta el mismo): “El teatro me sacaba los dolores”
- La sentencia que obligará al Ayuntamiento de Avilés a pagar hasta 18.000 euros a algunos trabajadores jubilados
- Habla el artesano que se rompió cinco costillas en las naves del Antroxu de Avilés: 'Le pudo pasar a cualquiera
- Este es el punto de Avilés por el que pasa un camión por minuto (y está pendiente de una gran infraestructura)
- La milla de oro de Salinas se extiende: cerca de una de decenas de chalet millonarios, a la venta
- Susto por un incendio en un tendal en pleno centro de Avilés
- Nuevo festival de música (para jóvenes) en Avilés: así será la primera edición del Monoloco