Opinión | Filazón
El mandil
Una prenda de vistir tradicional
Sentí señardá cuando revolviendo nun caxón alcontré un mandil dobláu, yá galdíu y con golor al pasáu, y que forma parte de los mios coses más preciaes. Fixi entós un repasu rápido, sobre la utilidá del mandil como prenda d’usu común nes distintes cultures. A lo llargo de la historia desempeñó diversos roles, con dixebraos diseños y modelos. Ye de destacar la so relevancia en distintos contestos, úsase como prenda de proteición en variaos oficios, imprescindible pa los cocineros y cocineres y tamién usáu polos carpinteros y ferreros, esti como proteutor contra oxetos afilaos o chispazos.
Sicasí, el mandil va más allá de la so función práutica, algamando un significáu simbólicu nes distintes cultures. Asociáu por veces col serviciu, ye elementu que formaba (o forma) parte del uniforme de les criaes, camareres y otres profesiones. Ye prenda de vistir de les muyeres n’aldea, que lu usaben a diario pal trabayu fuera y en casa.
Pensando nesta prenda del nuesu axuar caseru, nun se m’escaez aquel día, va pocu tiempu, que m’ asomé a la terraza col mandil puestu y una de les vecines d’enfrente estrañóse y díxome qu’en más de 40 años enxamás me viera de mandil; de xuru que pensaría que yo nun pasaba pela cocina, ensin saber que ye otra de les artes que me gusta muncho prauticar.
Pero los mios recuerdos llévenme hasta la infancia. Cuando tenía 11 años, mio madre encargó-y a una costurera el primeru que vistí de neña. Yera un "sisi", (asina lu llamábemos) asemeyáu a un mandil porque cumplía les mesmes funciones, pero que paecía un vistíu. Daquella taba de moda y asina nun nos emporcábemos y protexíanos bien la ropa. A mi gustóme, y hasta presumía con él puestu. Estrenélu pa un día de mayada en casa de mios tíos de ca’l Rondiellu.
N’otra ocasión, foi mio madre a la villa y tráxome un mandil "de costura" pa llevar a la clase de costura que recibíemos na escuela. Nun se m’escaez la ilusión que sentí. De cuadros blancos y negros, con dos grandes bolsos y unes cereces bordaes; gustábame tanto que, yá gastáu, guardélu como reliquia durante munchos años, hasta que mamá recortó les cereces y aprovechóles par decorar unes manoples de cocina de les qu’ella cosía.
Yá siendo yo madre, el mio fíu, nun viaxe y estancia que fixo a EE UU pa deprender inglés, tráxome de regalu un mandil guapísimu, de rayes blanques y negres y con un bordáu de los personaxes de la Warner Bros. Esi foi’l mandil que más utilicé, tanto qu’agora ta galdíu dafechu, pero consérvolu guardadín y tengo pensao reciclar el bordáu y encargar otru paecíu. Sentimentalismos que nos asalten a cierta edá.
Faciendo memoria otra vuelta de tiempos de la infancia, n’aldea, esta prenda yera imprescindible nel axuar de les muyeres. Siempre se tenía ún reserváu pa ocasiones especiales; había tar bien llimpiu y plancháu pa llucilu en celebraciones, comíes festives y demás. Elles, les de casa, cocinaben y sirvíen la comida y nun se sentaben na mesa, nun taba bien visto. Yeren otros tiempos.
N’aldea tenía amás otros usos, sirvía pa traer pa casa un mandiláu de mazanes, o de peres, o de güevos. Y hasta por veces pa llimpiar la cara a los neños si nun había un pañuelu a mou.
Nun puedo escaeceme del mandil que forma parte del traxe d’asturiana, hailos de tolos tamaños y colores, con bordaos más o menos recargaos o con abalorios y qu’adornan enforma’l conxuntu. Sicasí, a mi gústame’l del mio traxe de vaquera, que ye cenciellu y con una puntiella alredor. Tamién me gusta el del traxe de candasina que llevo tolos años al Cristo.
La pallabra mandil tien otros significaos, noma’l zarráu esterior de dalgunos horros y paneres pa protexer del aire y del agua.
El mandileru o mandilera ye’l que quier mangonialu too, mandaricar a los demás.
Y el mandilín ye’l que ta sometíu a los mandaos d’otra persona.
Esperemos que s’acaben los mandileros y los probes mandilinos y que’l mandil seya utilizáu na cocina por igual polos homes y muyeres.
Suscríbete para seguir leyendo
- Esperpéntico suceso en Avilés: denuncian a una madre por vejar a su hijo, menor, en un bar
- La historia de la recuperación del cáncer de Sergio Peris Mencheta (la cuenta el mismo): “El teatro me sacaba los dolores”
- La sentencia que obligará al Ayuntamiento de Avilés a pagar hasta 18.000 euros a algunos trabajadores jubilados
- Habla el artesano que se rompió cinco costillas en las naves del Antroxu de Avilés: 'Le pudo pasar a cualquiera
- Este es el punto de Avilés por el que pasa un camión por minuto (y está pendiente de una gran infraestructura)
- La milla de oro de Salinas se extiende: cerca de una de decenas de chalet millonarios, a la venta
- Susto por un incendio en un tendal en pleno centro de Avilés
- Nuevo festival de música (para jóvenes) en Avilés: así será la primera edición del Monoloco