De lluces

Entamó’l mes d’avientu y con él les lluces brillen en toles ciudaes en clara competencia por ver cuála tien la meyor illuminación, como si quixéremos allumar esti iviernu cercanu nel que nos amaga la escuridá, la escuridá de la vida, que por veces nun hai lluz que la pueda aclariar. Lluces que, per otra parte, tórguennos ver nidia la espectacular lluminaria del cielu ivernizu. Nada puede suplir la guapura natural d'una nueche estrellada vista dende un llugar onde nun esiste contaminación lluminosa y arropada pol mantu del silenciu infinitu. Un espectáculu que nos tresmite una emoción especial.

D’otramiente por munches lluces artificiales y otres pompes qu’anuncien la Navidá, por más bombilles que se cuelguen nes calles, foi perdiéndose’l significáu real d’estes fiestes. Non toos van poder esfrutar d’estos díes festivos nin van poder celebrales como nos manda o cuasique nos obliga la publicidá. Por citar dalgunes miseries que nos amaguen como guerres per tantos llugares del mundu, retales de la pandemia que nos llevó a tantos seres queríos, catástrofes recientes como la Dana sufrida en Valencia, que dexó a tentes persones ensin llar, families mutilaes y munches que se quedaron soterraes baxo la tempestá, amás otres munches llaceries, súmennos nuna tristura que nos encueye’l corazón y cáltrianos nes coraes ante tantes gafures de la vida que nun podemos detener.

Sicasí,dempués d’esti entamu pesimista, (asina lo siento), hemos siguir p’alantre, como siempre foi, y celebrar la Navidá y la vida pero ensin perder de vista, qu’en Navidá non too nin pa toos ye felicidá. La soledá amaga per uquier. Nestes feches nes que cuasi nos obliguen a ser felices, a consumir cuanto más meyor y a celebraciones exótiques, que por veces nun acaben de la meyor manera, lo que realmente tien importancia ye aprovechar p’abrazar a los seres queríos, pa esfrutar del cariñu de los nuestros, esfrutar de les persones que nos brinden amistá sincera, de les que de verdá nos dediquen un poco del so tiempu nesta vida tan allocada que nos tocó vivir. Esfrutar de los que tienen pa nós un requexu nel corazón, un requexu compartíu onde abriganos cuando sentimos "fríu", esi fríu que namás el calor humanu puede combatir, porque nun hai abrigu material que lu torne. Procuraremos aprovechar estes feches, sobre too pa compartir amor coles persones qu’illuminen cola so lluz la escuridá que munches veces nos tapez l’alma. n

Suscríbete para seguir leyendo