A vueltes colos güevos

Los güevos siempre fueron de munchu alimentu, comida cenciella y rápida de lo más rico y que mataron abonda fame en tiempu d’escasez; amás, coles mil formes de cocinalos fixeron siempre un manxar na mesa nos distintos puntos del Planeta. Pero llegó’l tiempu de la escasez y tán poniéndose poles nubes. Yo hubo dalguna vez, (contélu yá nestes páxines) que comí mediu güevu;fritu; foi momentu de risa, que non de fame, pero de siguir subiendo de preciu habrá que repartir. Paezme qu’aquel mediu güevu que comí con un amigu yera una premonición o un avisu de la escasez que nos aguardaba.

Cuando la mio casa de nacencia, por motivos tristes, hubo quedar zarrada, determinamos dexar ellí les pites, nel gallineru. Prestábanos dir de fin de selmana y tener güevos de casa, por cierto, siempre mui apreciaos. Elles quedaben col gallu de pastor y con comida na tolva, hasta que volvíamos. El gallu, en cuantes sentía llegar el coche lliábase a cantar y taba un bon cachu dándonos la bienvenida. A mi metióseme na cabeza que les pites y el gallu nos echaben en falta y que pola selmana taben tristes, polo que determiné regalales y que fueren pa otru gallineru onde tolos díes tuvieren la presencia de xente alredor.

Lo que nun desficimos foi el gallineru, y yá toi pensando en poner allí unes cuantes pites y un bon gallu, pa tener otra vuelta güevos de casa, frescos y ecolóxicos, y nun tener que pagalos caros no supermercáu, magar que tenga que dir a veles una o dos veces a la selmana pa que nun s’atristayen. Asina nun tendré d’andar aforrando nin comiendo güevos a medies.

Eso sí, pienso comprar pites pintes, de raza autóctona, que de xuru pondrá güevos de la meyor calidá. Lo que ye de nueso siempre lo consideramos lo meyor. Y ¡cómo non!

Claro que, como güei too se complica, primero de tener pites y güevos hai que sacar la llicencia y rexistrales, y nun sé si tendrán que llevar dalgún aniellu nes pates o’l carné d’identidá debaxo l’ala. Torgues y papeleos. Sicasí, too tien de tar llegal y ye una garantía sanitaria pa les aves y pal consumidor. Y les multes por tener pites ponedores ensin rexistrar son esaxeraes, más perres que lo que pueden valir los güevos que se consuman nunos cuantos años.

L’ello ye que toi contenta por tener el gallineru preparáu, viendo que va haber pites en patios y xardines, y quiciás hasta nes terraces de los pisos, lo que yá tien el nome d’avicultura traspatio. Ocúrreseme pensar qu’entamarán les denuncies de la vecindá; agora, too nos molesta y la xente nun va soportar el cacarexar del piteríu al altu la lleva, sobre too cuando ponen el güevu, y si tienen un gallu p’acompañales y "consolales", va haber más d’una protesta por tal espertador puntual, toles madrugaes.

En fin, que los tiempos cambien, que les pites van a convertise nun posible animal de compañía, nueves mascotes queríes y mimaes, correrán per casa y encuruxaránse en cualquier requexu a poner el güevín. Agora si que podemos dicir que podemos creer la fábula de Esopo: "la pita de los güevos d’oru", teniendo en cuenta que los güevos van ponese al preciu del oru.

Suscríbete para seguir leyendo