Blog 
Filazón
RSS - Blog de MªEsther García López

Archivo

  • 01
    Junio
    2013

    Comenta

    Comparte

    Twitea

    Alcohol

    Un problema social  qu'afeuta a tola población.
     

     La noticia espardida hai unos díes nos medios de comunicación, sobre la práutica que se ta poniendo de moda ente la mocedá d'emborrachase con támpax empapaos n'alcohol causó abonda alarma social, más porque ente les intoxicaes había una neña de menos de catorce años.


    Al empar estos díes tán saliendo a la lluz los datos de la investigación liderada por Antoni Gual, direutor de la Unidá d'Adiciones del Hospital Clínico de Barcelona, nomada «Proyeutu Ánfora», llevada a cabo por 71 científicos de 14 países, y na que tuvieron implicaes 30 instituciones. Los datos que nos ufierta esti estudiu, que duró cuatro años y nel que se gastaron cuatro millones d'euros, son alarmantes. N'Europa consúmese'l doble d'alcohol que na media del mundu. L'alcohol ye la droga más consumida ente los xóvenes ente los 14 y los 18 años, colos peligros qu'esta práutica supón y que s'agrava nesi momentu de l'adolescencia. Enfermedaes, problemes familiares, engarradielles, violencia de xéneru, accidentes de tráficu. Pero'l problema nun afeuta sólo a la mocedá, el problema ye de toos. L'alcohol ta causando n'Europa 138.0000 muertos al añu, l'equivalente a una ciudá como Llérida, Lleón o Tarragona.


    Y cabe pensar que nesta sociedá too son miedos y prohibiciones. Pero'l problema del alcohol ente los más xóvenes ta escapándosenos de les manes. De xuru que los mayores tenemos bona parte de culpa. L'alcohol ta socialmente almitíu, anque pensemos que les cantidaes pequeñes nun nos perxudiquen. Piden los espertos que s'alvierta nes etiquetes de les botelles de los peligros que tien el beber, como se fai col tabacu.


    El «Proyeutu Ánfora» llevóse al Parlamentu européu cola presencia de representantes de distintos países, que manifestaron el so esmolecimientu por esta droga estendida ente la mocedá, pero que tamién afeuta xente de toles edaes. Manifestaron el so pesar pola dificultá de poder facer frente a les polítiques de les grandes industries que promueven conductes saludables alredor del alcohol.


    Alvierten los espertos que realizaron l'informe Ánfora que pa desaniciar esta tendencia hai que prohibir la publicidá engañosa sobre les bondaes de les bebíes alcohóliques. Los empresarios «amuésennos na etiqueta la cara bona del alcohol, si ye que la tien, pero nun nos alvierten de la cruz na que pue tresformase'l so consumu».


    Qué tará pasando nesta sociedá que nosotros construimos pa que una parte de la xuventú salga de casa los fines de selmana namás naguando por emborrachase. Enfócase'l problema del «botellón» pola basura que xeneren los bebedores al so alredor, y los ruíos y follones que provoquen nel vecindariu, pero'l problema ye muncho más fondu. Nun nos queda más remediu que'entamar a trabayar nesti sen. Lo primero ye la educación y la información. Otra midida qu'apunten los espertos sería prohibir tola publicidá que pueda incitar a beber. Difícil llabor, porque l'alcohol ta presente en toles celebraciones sociales y dar exemplu ye mui difícil.
     

     

    Compartir en Twitter
    Compartir en Facebook