Blog 
Filazón
RSS - Blog de MªEsther García López

Archivo

  • 30
    Junio
    2016

    Comenta

    Comparte

    Twitea

    Oviedo asturias

    Don Quixote visita la mina d'Arnáu

    Don Quixote visita la mina d'Arnáu De lo que-y asocedió a don Quixote camín de La Mina d'Arnáu, con otres coses que tienen más de lo verdadero que de lo discreto

    30.06.2016 | 03:37

    Don Quixote visita la mina d'Arnáu
    Don Quixote y Sancho, plasmaos pol mar.
     

    M.ª Esther García Per caminos escaecíos, por atayos y siendes tapecíes, marcharon don Quixote y Sancho col guía, camín de La Mina d'Arnáu, col banduyu chen de sidra, dempués de pasar la mañana na fiesta de Piedrasblancas nel parque de la Llibertá. El guía diba esplicando-yos ensin callar tolo que víen alredor. Llegaron a la playa d'Arnáu al mediudía.

    Echaron don Quixote y Sancho la vista perdayures: vieron el mar, qu'hasta entós ellos nun vieren; paeció-yos espaciosísimu y ampliu, abondo más que les llagunes de Ruidera, que vieren en La Mancha; vieron un garapiellu de surferos que garraben foles y paecía que diben pel aire xugando cola espluma. Aquello despertó-y el maxín a don Quixote y entamó a barrenar.

    -Mira Sancho, qué montonera de tritones xuguetiando col agua. Mira Sancho, dime, piensa, como voi facer p'arremeter contra ellos. Toi encendiéndome Sancho. Cada vez vienen más pa la oriella. Enxamás vi unos homes tan raros. Son homes marinos, Sancho, homes prietos con piel de sapu. Nun podía maxinar que la mar ta enllena de tritones. Nun sé si voi ser quien a vencelos. Y vienen armaos, Sancho. Agora mesmu saco la espada y la llanza y baxo a la playa darréu. Ata a Rocinante per ehí.

    Y cola mesma tiróse don Quixote del xumentu y arrimándose al muru la playa entamó a facer esparabanes. Sacó la espada y la llanza y entamó a preparase pa la llucha.

    El guía que diba esplicándo-yos el paisaxe y tolo que diben viendo, intentó quitá-y aquella tochura de la cabeza.

    -Non, vuesa mercé. Equí nun hai tritones, enxamás los vimos, namás de xemes en cuando apaez dalgún delfín pero son inofensivos. Nin vimos tritones nin vimos serenes. Estos son surferos, son xente de paz. Los tritones son coses del maxín.

    Pero don Quixote nun atendía a razones, entamó a barrenar y a pensar qu'aquello que taba viendo namás podía ser una manada tritones armaos que veníen a por ellos.

    Y siguió Sancho alvirtiéndolu de los peligros.

    Mio señor, nun ve vuesa mercé que nun trai ropa afayadiza pa metese no mar. Nun ve que si se mete nel agua cola armadura, colo que pesa, va dir pal fondu darréu y, amás, va ponese-y toa ferruyenta. Nun ve que vusté ye de secanu y va garrar una pulmonía si se mete nel agua, que debe tar xelao. Mio señor, si comete esta llocura, va enfermar, de xuru. Va ataca-y una malura que lu va llevar pal otru mundu.

    Sancho, tamién taba plasmáu mirando pa toos aquellos que se poníen de pie enriba les foles. Y hasta duldaba si'l so amu tendría razón. ¿Seríen estos los fíos de Poseidón, colos que don Quixote bataquiara tantes veces? Nestes los surferos salieron pa l'arena y entamaron a quitar los traxes y quedáronse elli en porrica, como Dios los traxo al mundu. Aquello foi lo que-y fixo a don Quixote enfotase más naquella escena y entamó a dar voces dende enriba y a amenazalos cola espada.

    Los surferos paráronse a mirar quién yeren aquellos tochos que se fixaben nellos y-yos vociaben.

    Una surfera dixo:

    -¡Pero si son don Quixote y Sancho!

    -A ti, guah.a, sentóte mal garrar foles ¿Ves visiones o qué?

    Mentanto don Quixote siguía enfotao naquello y cada vez encendíase más.

    -Sancho, van atacanos, Sancho, tengo que lluchar contra estos homes marinos, voi vencelos Sancho. Mira tu onde fui atopar los fíos de Poseidón. Amira Sancho, la cola tresformóse-yos en pates. Tal como yo lo lleí. Mira como reblinquen pel sable. Hai qu'entamala, Sancho, que vienen a por nós.

    Sancho faló-y al guía, qu'amás yera'l direutor de La Mina.

    -Mire a ver cómo lu convencemos de llevalu a visitar La Mina darréu, mire que va desatar una catástrofe ehí embaxo. Van matalu, van matalu. Y lo peor de too ye que nun sabe nalar. El mio señor va afogase. Llámelu, llámelu vusté a ver si-y fai casu.

    Pero don Quixote corría pela rampla pa baxo, cola espada n'altu, decidíu a lluchar colos tritones.

    -Nun s'esmoleza Sancho, que nun s'afuega-díxo-y el guía-. Tán ehí los socorristes de la playa que lu van controlar.

    Cuando llegó don Quixote enraxonáu a la playa, ellí na mesma entrada había tres moces tomando'l sol coles tetes al aire. Quedó cortáu y paróse en secu; taba embobáu, mirando pa elles. Entamó a regallar los güeyos que cuasique se-y salíen de les órbites, y escaecióse de los tritones pa enfotase naquello que tenía delantre, y entamó a vocia-y a Sancho que baxaba pola rampla pa baxo a buscalu.

    -Sancho, mira Sancho, equí hai tres serenes xuntes. Enxamás podía maxinar que diba ver n'Asturies serenes, Sancho. Cuerri Sancho. Baxa agora mesmo que me ta dando mal. Tal cual yo lo lleera naquel llibru que me robaron na posada d' El Toboso y qu'enxamás volverá a les mios manes. ¡Tres serenes xuntes ¡ y ¡qué serenes, Sancho!

    Nestes, llegaron corriendo, los surferos a onde taba don Quixote embobáu, contemplando tanta maravía, y entamaron a llamar a los otros que taben más allá asombraos de lo que taben viendo. Ún d'ellos que yera un cachondo, entamó a echa-yos un discursu:

    -¡Bien veníu la flor y la nata de los caballeros andariegos! Bienveníu seya a la playa d'Arnáu l'espeyu, el farol, la estrella y el norte de tola caballería andariega. Bienveníu seya, digo, el valerosu don Quixote de La Mancha: non el falsu, non el finxíu, non l'apócrifu qu'en falses histories estos díes nos presentaron, sinón el verdaderu, el llegal y el fiel que nos describió Cide Hamete Benengeli, flor de los historiadores. Sí, amigos, esti ye don Quixote, el mesmu, de carne y güesu.

    Y xuntándose tolos surferos entamaron a caracoliar desnudos alredor de don Quixote y a glayar y a aplaudir.

    Nun dixo pallabra don Quixote, cuando vio aquel tropel de "tritones" en porrica, retrepos y musculosos, y dirixéndose a Sancho, dixo-y:

    -Estos tritones bien nos conocieron; toi por apostar a que lleeron la nuesa historia.

    Faló-y otra vegada'l surferu a don Quixote, y díxo-y:

    -Vuesa Mercé, señor don Quixote, véngase con nós, ¿nun quedrá metese al agua y garrar unes foles? Nel mar hai serenes que canten como los ánxeles. Nel mar hai ¡munches ayalgues!

    Don Quixote siguía plasmáu contemplando aquelles moces, que-y calmaron el maxín y fixéron-y escaecese de que baxaba a lluchar colos tritones. Miró pa Sancho, que nun tardó n' alvertilu.

    -Mio señor, nun ve que se nos fai tarde pa entrar a visitar la mina. Nun ve que ta equí'l guía esperándonos y que yá-y aprovez la mañana. Mio señor, un podemos perder más tiempu.

    Aprovechando un descuidu, entre proposiciones y alvertimientos, garraron les moces los tarecos y marcharon corriendo, ensin que don Quixote se diera cuenta. Elles entovía nun gorgutaren pallabra porque nun sabíen qué yera too aquello, ¡aquel tolo dando voces y confundiéndoles con serenes! Pensaben elles que sería dalgún aventáu que se disfrazó de don Quixote y que, como él, maxinaba tochures. Por eso diéronse de pates, polo que pudiera pasar.

    El guía nun sabía que facer pa sacar a don Quixote de la playa. Más porque taba xubiendo la marea y diba envolvelos una fola.

    Mire, vuesa mercé, más val que vayamos xubiendo pa entrar na mina. Ellí, baxo tierra, hai muncho pa maxinar. Ellí tamién s'oyen serenes cantar. Espéranos el trasgu la mina, un trasgu pequeñín qu'enrieda con tolo qu'ahí per aquellos requexos y galeríes; espérennos espíritos y pantasmes y otres munches coses.

    Esto distráxo-y el maxín a don Quixote, que taba entovía clisáu ya embobáu de tolo qu'allí viera, y respondió-y resueltu al guía:

    -Lleváime au vos pete, que yo nun voi tener otra voluntá que la vuesa, y más si ye p'amosame dalgo baxo tierra, onde podré vivir otres aventures.

    El guía siguía contándo-yos coses del mar, mientres xubíen, adulces, pola rampla p'arriba pa la entrada La Mina.

    Los surferos quedaron embaxo falucando de lo qu'acababen de presenciar, y duldando de lo que vieren. Cavilaben y pensaben si nun sería una performance que'l guía'l muséu-y dio por traer a Arnáu, como ún espectáculu más de los tantos que se-y ocurren.

    Cuando don Quixote y Sancho llegaron a la esplanada la Mina, taba un municipal esperándolos:

    -Señores, yá díbemos prindar estos burros. Pero, ¡vustedes quién se creen pa meter los burros hasta la mesma entrada de La Mina! Y pa enriba, déxenlos sueltos y tán esfamiaos. Lleven pacío mediu prau. Y sacó la llibreta pa multalos...

    Hasta que'l municipal entamo a alloriar...

    -Pero... si son don Quixote y Sancho ¡Esto ye imposible!

    -¡Los mesmos!-dixo'l guía, resueltu.

    -Pero ¿entovía anden estos dos per ehí dempués de 400 años? Esto ye imposible, imposible, y entamó a llimpiase'l sudor. Dalgo me ta pasando. ¡Toi viendo visiones! ¡Toi pasándome! ¡Va dame un vaíu!

    Y marchó voláu a metese nuna de les cases que tán a la vera La Mina, pa que-y dieren un vasu d'agua.

    El guía adientróse con don Quixote y Sancho pa La Mina y sabe Dios lo que tará pasando ellí dientro.

     Don Quixote visita la mina d'Arnáu
     Don Quixote visita la mina d'Arnáu
     Don Quixote visita la mina d'Arnáu
     
    Compartir en Twitter
     
    Compartir

     

    Compartir en Twitter
    Compartir en Facebook