Blog 
Filazón
RSS - Blog de MªEsther García López

Archivo

  • 19
    Septiembre
    2019

    Comenta

    Comparte

    Twitea

     
    Oviedo asturias

    L'AÑADA

    L'Añada

    Les añaes ente temática d'amor y mieos duermen dende cuantayá a tolos neños del mundu

     
     

    m.ª esther garcía | escritora 19.09.2019 | 02:58

    L'AÑADA
    L'Añada

    El primer contautu del neñu cola lliteratura ye l'añada, canción que-y canta la so ma con dulzura. Nes añaes, de temática mui variada, apaecen distintos personaxes reales y de ficción, y por veces son versos en tonu imperativu, y en dalgunes apaecen seres de los qu'asusten a los nenos:

    Ea, ea, ea, / nenín de l'aldea / Ea. Ea, ea / que bien el papón / zarra los güeyinos / Ea, ea, ea / que lu escuerro yo.

    Sábese que la música ye terapia pal alma. Y entama a cumplise con estos cantares que sentimos na cuna, interpretaos sobre too poles madres y les güeles, tíes, hermanes mayores y hasta les ames de cría y les criaes, (éstes últimes en ciertos ambientes de ricos). Fuimos xeneralmente les muyeres les que xeneración tras xeneración, nos ocupamos de tresmitir esta parte del cancioneru popular. Llabor de la muyer nestos momentos íntimos, tan importantes pal neñu, como ye la hora del sueñu. Agora, na so mayoría tán recoyíes per escrito, lo que da seguranza de qu'enxamás se pierdan. La voz melosa y el ritmu dulce d'estes canciones fai les delicies de los más pequeños, que se duermen al compás de la música y del banciar de la cuna. Quiciabes nel posu la memoria tenemos inda aquelles estrofes que les nueses madres nos tarariaron nos primeros meses y años de vida.

    "Durme mia nenina / durme sin pena / porque al pie del trubiecu / la to ma vela".

    Foi perguapa la velada que disfrutamos coles añaes que sonaron hai unos díes nel Salón d'Actos del Antiguu Institutu de Xixón. "Añadas: Canciones para soñar despierto". Momentos pa suañar, como si volviéremos a la infancia.

    Nesti proyeutu, al estensu repertoriu esistente, amiéstense les nueves añaes, unes cuantes canciones de la mano de cuatro poetes asturianes, Marta Mori, María Esther García López, Pilar Sánchez Vicente y Laura Marcos. Muyeres qu'amuesen la so sensibilidá poética nestes composiciones pa cantar a los más pequeños. Añadas a les que la compositora Ana Vázquez Silva puxo música, música del cielu y que fueron maxistralmente interpretaes pola sopranu Paula Lueje y la pianista María Cueva; adornaes amás con un montaxe audiovisual de Sofía Lueje. En total ocho muyeres enfotaes n'apurrir nueves canciones pa dormir a los neños ensin perder la esencia de lo tradicional pero col envís d'anovar el repertoriu que yá tenemos dende époques ancestrales y qu'a lo llargo del tiempu fueron tamién arriqueciendo otros grandes poetes ya investigadores, que recoyeron, recrearon y escribieron guapes añaes. Por citar dalgunos: Federico García Lorca, Gerardo Diego, Vicente Aleixandre, Rafael Alberti, Miguel Hernández, Gloria Fuertes, Fernán Coronas, o Carmen Conde, etcétera. Y autores hispanoamericanos como Nicolás Guillén, Gabriela Mistral o Pablo Neruda, ente otros. A estos y otros escritores súmense agora estes cuatro autores, con añaes en llingua asturiana, ilusionaes con dedica-yos los sos versos a los más pequeños.

    Y acabo esti artículu con unos pocos versos que formen parte de l'añada "Suaños", de la que soi autora, dedicada a Adela la mio nietina dominicana:

    Zarra los güeyos, que sal la lluna, / date la mano y date un chuchín. / Duermi mio neña, suaña una estrella / Coles manines, garra'l to osín./ Duermi xanina / Duermi coquín (...).

     

    Compartir en Twitter
    Compartir en Facebook