Blog 
Filazón
RSS - Blog de MªEsther García López

Archivo

  • 24
    Octubre
    2017

    Comenta

    Comparte

    Twitea

    Oviedo asturias

    La quema

     

    Too arde nesta sociedá de violencia y llocura

     M.ª Esther García López 24.10.2017 | 04:01

    La quema

    Contemplamos a diario dos fenómenos naturales fermosísimos: la puesta del sol y l'alborecer. La llegada l'alba ye un espectáculu sorprendente, y más polo que simboliza un nuevu amanecer, que siempre recibimos confiaos en que veremos la lluz. Como nos diz la canción, "que dalguién me diga que'l sol sal siempre".

    Sicasí, hai veces que nun sal el sol, que la lluz nun nos alluma l'amanecer. Hai veces que l'alborecer se ve empañáu pola nublina del dolor.

    El pasáu llunes, vivimos con esmolecimientu que l'amanecer nun llegaba. Un fumu anaranxao enllenaba'l cielu y la escuridá tapecía l'alba. Una vez más, el fueu envalentonao abrasó distintos puntos d'Asturies y de Galicia, El fumu tapeció los rayos del Sol y el golor a quemao inundó l'ambiente por munches hores.

    Cuando yera neña, la mio maestra dicíanos que'l mundu diba acabase con fueu. Esti mensaxe formaba parte de les mios esmoliciones de neña, que nun yera quien a dixerir ciertos mensaxes como aquel. Nin yera a maxinar el fueu que nel infiernu quemaría a los malos, como nos metíen na cabeza.

    Poro, cuando estos díes presenciaba les estremecedores estampes del fueu, que cuerre con llocura, que cruza carreteres, ríos y caminos y que se fai difícil de controlar, pensaba naquel mensaxe que la maestra nos llanzaba. Nun pue haber un infiernu tan espantosu como'l que se vive cuando se sufre unes quemes de tales dimensiones.

    Nun se sabe qué pensar cuando'l fueu se ceba dende distintos puntos y se fai cuasi incontrolable. Son munches les circunstancies que lo alimenten. Los pirómanos, quiciabes pirómanos organizaos, la maleza que medra per uquier y los montes que tán ensin cuidar y con abondo de lleña pa echar al fueu. Hasta hai unes décades la xente del campu cuidaba los montes, porque d'ellos aprovechábase too, la ganza pa estrar les cortes, la lleña y les piñes pa la cocina, el toxu pa los burros, y hasta'l ganáu diba al monte p'aprovechar la pación. Los vecinos de l'aldea ocupábense de tener los montes llimpios y les carriles y caminos abiertos. Agora, en pocos años, el mundu rural cambió enforma. Yá nun se roza la ganza porque nun se mullen les vaques, nun s'aprovecha la pación del monte. Too esto y les polítiques represives qu'impiden a la xente beneficiase llibremente de los montes, cambiaron dafechu'l paisaxe de l'aldea. El monte enllenóse de vexetación brava, lo que favorez que los pirómanos tengan inda más facilidá pa satisfacer los sos deseos de llocos.

    Ye verdá que siempre hubo pirómanos que prendíen el monte. Antaño, sentimos munches veces les campanes de la ilesia "tocar a fueu". Daquella los vecinos respondíen al llamáu de les campanes y ellos mesmos, poniendo en peligru la so vida, apagaben el fueu que, pola mor de tar los montes rozaos y dominada la maleza, nun s'estendía cola mesma facilidá.

    Les quemes d'estos díes aféutennos a toos, a los que les sufrieron más de cerca y a los que les presenciamos a traviés de los medios y nos dolemos de los que tuvieron que marchar de les sos cases y abandonar lo suyu ante l'amagu del fou engafentao. L'ello ye qu'arde'l mundu, porque non solo arden los montes, que yá ye abondo, arde'l mundu y hai lleña y maleza a mamplén p'atizar el fueu de la violencia, de la dixebra, de la guerra. Esa ye la otra "quema" que tamos viviendo en distintos puntos del planeta, dalgunos bien cercanos.

    Les quemes que nos afeuten, tanto les de los montes como les quemes ensin fueu físicu, formen parte de la incomprensión, del egoísmu, de la falta d'empatía que se respira nel ambiente y de la llocura que la falta de valores y de civismu ta xenerando na nuesa sociedá.

     

    Compartir en Twitter
    Compartir en Facebook