Llibros

Vien de cellebrase la fin de selmana pasada, el vienres 25 y el sábadu 26 d’abril, la primer edición de Llibros (La Feria de Corvera). Ye esti alcuentru lliterariu una recuperación d’aquelles feries que se cellebraron nel conceyu nos yá llonxanos años 80, gracies daquella al enfotu d’un puñáu de llibreros y activistes culturales.

40 años depués Corvera tien, de nueves, unes feches empobinaes a costafecha a la lliteratura, nes sos distintes estayes y estilos: narrativa, poesía, teatru, animación a la llectura infantil…

Ye una idega, esta de recuperar la Feria del Llibru pal conceyu, que yá xurdió fae dellos años nel maxín de los xestores culturales y que foi cociéndose sele, pasu ente pasu. Naz, en pallabres de los sos cabezaleros, col enclín de da-y a esti eventu cultural, y quiciabes esto seya lo más importante: continuidá nel tiempu. Ensin escaecer nin da-y menos valir a otros aspectos que rescamplen nesta primer edición: l’altor y la calidá de los autores convidaos a participar nos distintos actos, talleres y alcuentros con llectores, escolinos y públicu en xeneral: Pedro de Silva, Pilar Sánchez Vicente, Xuan Bello, Paco Abril o Benjamín Prado, ente más otros.

Pero quiciabes l’actu qu’abrió esta Feria’l vienres 25 seya ún de los más prestosos y guapos, onde se pudo sentir les aportaciones d'escritores locales, de casa, alrodiu del actu d'escribir y les circunstancies variaes que lu arrodien. Na haima asitiada al llau d’El Llar cellebróse una Mesa Redonda, entitulada "Esscribiendo en Corvera nel Sieglu XXI” onde, xunta al que firma esti testu, participaben dellos de los autores nacíos o venceyaos a Corvera. Dende les voces con pesu y autorizaes de Cristina Muñiz y Xulio Vixil a les nueves apariciones de Chechu López y Paula Expósito. Son estos dellos de los escritores que desenrollen les sos obres nesti conceyu, ensin escaecer otros nomes como Carlos Barral o David del Rivero.

Nesti alcuentru’l públicu asistente pudo afitar la pluralidá y deversidá de voces y creadores del conceyu. Corvera quiciabes tea recoyendo agora, nes voces más moces, el llabor de tolo que lleva semando va tiempu. Ufriendo a tolos vecinos, dende bien nenos, oportunidaes culturales: alcuentros con autores, recitales, representaciones teatrales, xornaes, esposiciones … Al empar d'esta ufierta cultural, bien grande ya interesante pa toles edaes, el conceyu da la oportunidá, abre les puertes de les sos instalaciones (El Llar, La Llechera, Centros Socioculturales,...) pa que los artistes locales amuesen les sos creaciones al restu'l conceyu. xenerando asina, de contino, una enerxía, una canal que valga pa siguir creando, pa siguir tresmitiendo Cultura.