Versovera

Como homenaxe, reconocimientu y tributu a los autores en Llingua Asturiana desenrollóse nestos primeros díes de mayu la 46 Selmana de les Lletres Asturianes, qu’esti añu se dedícó a la memoria de Xosé Álvarez, Pin. Esti eventu cultural entamáu pola Conseyería de Cultura del Principáu d’Asturies tuvo un actu, dientro del so programa, nel nuesu conceyu.

El pasáu miércoles 7 de mayu tuvo llugar en La Llechera de Cancienes, edificiu remocicáu pa la cultura en forma de teatru, una nueva edición de Versovera. Un alcuentru lliterariu, un recital de poesía n’asturianu, que lleva desenrollándose en Corvera dende’l 2015.

Pasaron per esti recital, nes sos diez ediciones, más de cuarenta autores. Siempre tentando ufrir al públicu una güeyada rica, plural y diversa de la creación poética contemporánea n’asturianu. Versovera ye una oportunidá pa sentir les voces, mesmo d’autores con una trayectoria bien llarga y reconocida, como les d’otros que tán dando los sos primeros pasos nel universu poéticu asturianu.

Nestos diez años, esti que firma’l testu, tuvo la suerte de ser convidáu a participar nesti recital. Asina pude compartir col públicu, que siempre tuvo una perbona respuesta en cuantes a asistencia, les creaciones poétiques de munchos de los más renomaos escritores contemporáneos n’asturianu.

Esta edición de 2025 entamóse, como les anteriores, gracies al compromisu del Conceyu de Corvera pa cola Llingua Asturiana y baxo la xestión y el bon facer de los responsables del Serviciu de Normalización Llingúística / Casa de la Llingua y de la Xerencia de Cultura. Enllenaron La Llechera de Cancienes los versos d’autores como: Ánxela Gómez d'Ávila, José Luis Rendueles, Aida Escudero o Pablo Rodríguez Medina. Punxo’l ramu a esti recital, como vien asocediendo dende fae yá dellos años, un conciertu, nesta ocasión del grupu de rap n’asturianu Monstru l'horru.

Diose anuncia, nesta cabera edición de Versovera, de la espublización d’un llibru. Nel mesmu va atropase una esbilla colos poemes de tolos autores que pasaron per esti recital nestos diez años, ufriendo asina al llector una amuesa mui completa cola qu’averase, namás nun volume, al panorama poéticu más actual na nuesa llingua. Esta compilación, pémeque, da-y entá más valir al llabor fechu alrodiu la poesía n’asturianu en Corvera nesta última década.

Suscríbete para seguir leyendo