Atiendi, Asturies, atiendi

El documental garra pal so títulu el d’un poema de Manuel Asur, ún de los primeros escritores del "Surdimientu". Poema que tresformó en cantar el grupu "Nuberu".

Esti pasáu xueves 15 de mayu proyectóse, en La Llechera de Cancienes, el documental "Atiendi, Asturies, atiendi" (Cuatro Gotes Producciones). Baxo la direición d’Inaciu Galán, que caltuvo depués una interesante charra-alderique col públicu, esta pieza audiovisual ye un un homenaxe a Conceyu Bable, colectivu entamáu en 1974 y que nel 2024 cumpliera 50 años, dedicándo-y por ello la XLV Selmana de les Lletres Asturianes.

Conceyu Bable foi una asociación que lluchó pola defensa y la dignificación del asturianu y de la identidá y la cultura d’Asturies. Supón el xurdimientu del movimientu de recuperación y reivindicación de la llingua asturiana y l’apaición del asturianismu modernu. Conceyu Bable foi un colectivu pioneru na reivindicación llingüistica. Cambió la hestoria de la llingua asturiana, dándo-y futuru. Derrompió'l camín de la normalización llingüística y social del nuestru idioma.

Conceyu Bable desenrolló un llabor pergrande nes más estremaes estayes. Quiciabes el más bultable ye’l que fizo posible que güei teamos falando y escribiendo nesti idioma. Como exemplu esti cenciellu artículu qu’agora tas lleendo. Conceyu Bable foi quien a xorrecer y modernizar l’idioma y qu'anguaño seya posible facer n'asturianu, lliteratura, cine o música d’altor y calidá, mesmo qu’investigación científica o tesis doctorales na universidá, ente más otros.

Trabayaron tamién n’otros munchos frentes: nel reivindicativu, coles sos campañes pidiendo "Bable nes escueles" y "Autonomía rexonal"; nel enseñu de la llingua (promoviendo cursos); na so difusión nos medios (prensa y radio); y nel editorial, col asoleyamientu d'obres ÿ de llibros onde recoyeron les obres ganadores de los sos concursos lliterarios.

Dexaron tamién otres señes que formen, dende cuantayá, parte de la identidá d’Asturies pero de les que, de xuro, munchos asturianos desconocen el so orixe; como son la bandera d'Asturies, recuperada de los estandartes del "Llevantamientu" de mayu de 1808, o’l glayìu asturianista más repetíu, el "¡Puxa Asturies!".

La creación d'una Academia de la Llingua foi otra de les reivindicaciones qu'acabaría algamándose en 1981. Esi llogru, sicasí, diba ser tamién el final de Conceyu Bable pa dar pasu a una dómina que llega fasta esti sieglu XXI, onde entá alienda la nuesa llingua, qu’espera y nagua pola so oficialidá.