El Teodoro Cuesta de Mieres va sobre ruedes. L’alumnáu de quintu y sestu deprende toles selmanes a caltener l’equilibriu. Monten en patines, en llinia o de cuatro ruedes, y tamién en patinete, y lo faen n’horariu escolar col envís de conocer un deporte bien afayáu nel so conceyu y de salir de la rutina de les clases d’Educación Física. "Nun van tolos rapacinos del centru, van solo los mayores", desplica Juan Miguel Molinero, el direutor y profesor d’esa materia. La práutica del patinaxe tamién ye una bona ferramienta pa la coordinación, amás de pal fortalecimientu y tonificación muscular.

Un grupu d’alumnos de sestu, sentaos nes grades del Visiola Rollán enantes d’una clas d’Educación Física.

Eses clases de patinaxe son fuera del centru escolar; desendólquense nel polideportivu Visiola Rollán, xestionáu pol Club Patín de Mieres. "Cada día que toca patinar, los rapacinos van encantaos", sorraya Molinero. Cuando toca calzase los patines, dalgunos escolinos camienten na posibilidá de formar parte, dalgún día, del club de h.oquei y patinaxe artísticu del municipiu, ente otres cuestiones porque ye un grupu de deportistes qu’algamó ya dellos podios; unu d’ellos foi’l tercer puestu nel Campeonatu d’España alevín.

En total, ventiocho guah.es deprenden les riegles básiques del patinaxe n’horariu escolar. Catorce son de quintu y los otros catorce de sestu cursu. El resto d’escolinos, d’otres estayes, espera poder participar nesta iniciativa nos años vinientes.

Delles clases de patinaxe de los escolinos de quintu cursu.

El Visiola Rollan ye’l pabellón de h.oquei de Mieres, donde’l Club Patín entrena y xuega los sos partíos. Dacuando esti club entama delles actividaes como los campus de branu y de Navidá. Entós ye cuando’l colexu Teodoro Cuesta céde-yos les sos instalaciones, y les aules conviértense nun albergue con cames en cuenta de meses y silles. "Ye un ‘quid pro quo’, ellos déxennos dir al pabellón y nós facemos lo mesmo col colexu", espón el direutor del centru educativu mierense.

Mario Gomes ye’l presidente del Club Patín Mieres, que cunta con estaya de patinaxe artísticu y de h.oquei. Defiende la colaboración del so grupu col Teodoro Cuesta non solo polos beneficios en sí pa los rapacinos, sinón tamién porque val para formar cantera y aficionaos al deporte. "El h.oquei y el patinaxe artísticu, y tolos deportes en xeneral, ayuden a forxar una disciplina, y empezar estes actividaes nel colexu ye una bona xera", diz el presidente del Club Patín Mieres.