La música asturiana, especialmente la folk que se ta editando nos últimos años, caracterízase pol excelente nivel instrumental. Músicos xóvenes, munchos d'ellos con formación académica, toquen maraviosamente pieces tradicionales o composiciones modernes, d'autor, con una técnica llimpia y un soníu soberbiu. Sicasí, ye bastante habitual topar que la voz que canta nun algama la mesma excelencia. Nun voi dar nomes nesta ocasión, pero nes últimes décades hai bandes folks que llograron una importante sonadía interpretando temes instrumentales, hasta qu'abríen la boca: la voz nun taba a l'altura.

Por eso, nun discu folk como'l qu'acabamos de sentir, ... Na fonte La Canalina (¿pa qué esos puntos suspensivos enantes del títulu?), lo primero que destaca ye la voz xoven, fresca y versátil de Tania Pereira, a la que tuviéramos la suerte de sentir en directu nel homenaxe que l'Ayuntamientu de Cangas del Narcea fixera al escritor Basilio Garrido en marzu de 2009: les espectatives qu'abría aquel día cúmplense de maravía nesti CD. «Brandal», el grupu folk del suroccidente d'Asturies, compónenlu, amás de Tania, Pedru Pereira, guitarra y compositor; el gaiteru Carlos Fernández, tamién compositor d'un par de temes; el baxista Miguel Crespo y Óscar Doural, un excelente percusionista. De los catorce temes qu'inclúi esti trabayu, nueve son tradicionales de la zona, deprendíos de músicos populares como'l gaiteru Antón de Fonduveigas, les pandereteres de Trabáu (Arcides y María, que toquen nel «Baille d'alredor»), Francisco Filipón, Faustinu Paulón, Neto padre o Clemente de Ferreira, colo que Brandal rescata unes músiques fuertemente enraigonaes na zona, y que casique nun s'incorporaren al patrimoniu sonoru asturianu de güei. Dos pieces, «Un circu nel Rebollal» y «La Canalina», les dos instrumentales, tán compuestes por Carlos Fernández.

Pero nel discu, que termina siendo desigual, rescamplen los tres temes creaos por Pedru Pereira, especialmente'l cantar que lu abre, «Chueve», cenciellu y eficaz, líricu y guapu. Pereira ye un cantautor que trai pal occidente d'Asturies sones del mundu, de la nueva trova cubana al nuevu «canciu» astur pasando pelos cantautores españoles o pol portugués José Afonso. En 2004 sorprendía col so primer trabayu discográficu, «Xedré». Igual los sos cantares nun son composiciones puramente folks, pero nun da más; tienen lo que precisa la música pa comunicar: sentimientu, arte y actualidá na midida en que falen del nuesu tiempu. Si a ello xuntamos la voz llimpia de la so fía, Tania Pereira, el resultáu nun pue ser nin más llucíu nin más esperanzador.