19 de mayo de 2010
19.05.2010
Con llingua propia

Una vida entera

13.05.2010 | 02:00
Una vida entera

Dende l'añu 2006 la Xunta Xeneral del Principáu d'Asturies súmase a la celebración de la Selmana de les Lletres Asturianes con un actu lliterariu. A la convocatoria respuenden homes y muyeres: diputaos, conseyeros, senadores, conceyales, directores xenerales, rector, síndicu mayor? Per una hora abandonen la batalla política y lleen en públicu un textu lliterariu n'asturianu o en gallego-asturianu. Tien interés observar tanto la evolución de les llectures como les presencies y ausencies (más allá de problemes puntuales d'axenda). Cada añu los que participen lleen meyor y la selección de los textos ye más personal y variada, como si la lliteratura asturiana pasara de ser dalgo ayeno a bona parte de la clas política a tener ente los representantes de la sociedá asturiana llectores sinceramente interesaos. Va notándose'l gustu por lleer a un autor o autora del propiu conceyu, o por seleccionar textos colos que s'identifica quien llee.


Amás d'esti actu, onde siempre destaca la contribución filosófica y humorística de Manuel Fernández de la Cera, escrita por él mesmu, la Xunta Xeneral edita tamién una antoloxía de lliteratura breve. L'álbum de Talía foi la de 2006. Siguieron Cuentos mínimos (2007), Sentir que toi viva (2008), Caminos que naide triara (2009) y Una botella d'agua enllena de tierra vivo, el d'anguaño, que toma'l títulu d'un versu de Xosé Antonio García, poeta fallecíu en 1997 al que se dedica la Selmana de les Lletres. A los participantes pidióse-yos una historia o reflexión sobre la diversidá de les formes de vida, coincidiendo con qu'esti añu 2010 ye l'internacional de la Biodiversidá.


El resultáu ye mui variáu, como lo vien siendo la lliteratura nes dos llingües non castellanes que conformen el volume, l'asturiana y la gallego-asturiana. Nos textos breves que podemos lleer queda bastante bien reflexáu l'inclín lliterariu de cadún de los escritores (trece muyeres y ventiocho homes, lo que da cuenta de la importancia que tien la voz femenina): el culturalismu d'unos, la esmolición existencial, social o ecolóxica d'otros, la praxis infantil en dellos, el xuegu lliterariu, la reflexión llingüística, l'humor, la tristura? Cuarenta y seis años, una vida entera, separen al autor de más edá (Vicente García Oliva, nacíu en 1944) del más mozu (Miguel Rodríguez Monteavaro, de 1990). Como esta antoloxía, de curiada y elegante edición, nun se pon a la venta, quien quiera facese con ella nun va tener más remediu que pidila a la Xunta Xeneral.

Compartir en Twitter
Compartir en Facebook
Enlaces recomendados: Premios Cine