16 de diciembre de 2010
16.12.2010
ÚLTIMA HORA
CCOO convoca huelga en Renfe y Adif el 21 de diciembre y el 7 de enero
 
Con llingua propia

Percepción y pensamientu

16.12.2010 | 01:00
Percepción y pensamientu

Héctor Pérez Iglesias (Arlós, Llanera, 1978) tien la rara virtú de llograr un consensu positivu sobre la so creación poética. Y nun ye nada fácil na lliteratura que se fai n'Asturies, onde abunden les capielles personales, llingüístiques y hasta ideolóxiques. Llibru a llibru, escribiendo cada vegada meyor, con más dominiu de la ferramienta llingüística, Pérez Iglesias yá ye una referencia imprescindible, non de la poesía moza asturiana, sinón de la poesía n'Asturies. Queda yá lloñe aquel primer llibru, Las tardes baldías (2004), escritu en castellán. A partir del 2006 (Prisión de náufragu), la so poesía desolada y en continuu descubrimientu parez que s'expresa meyor n'asturianu, entregándonos unos llibros de poemes densos, mui ricos n'imáxenes, d'extraordinaria potencia creativa.


El llibru L'amarga cazumbre (2008), en viéndolu con cierta perspectiva, parez qu'abrió un ciclu nuevu na so poesía, con una obra de raigañu figurativu que-y sirvía pa reflexionar sobre una de les constantes poétiques de cualquier lliteratura: el pasu del tiempu. Esi ciclu sigue en Como crecieres tu, publicáu nel mesmu 2008, nel qu'afonda na extrañeza vital, saltando del territoriu de la infancia que puebla la memoria al presente, pero cualquier materia-y val al poeta pa trabayar: el tiempu que fai, un paséu cuando anuecha, un alcuentru que parez vanal y resulta definitivu. Nun renuncia al xuegu tipográficu nin al irracionalismu, anque ensin perder del too l'aldu.


Dientro d'esi mesmu ciclu, nun sé si pesllándolu, taría Lo peor del bon tiempu, el llibru que nos llega agora avaláu pol Premiu «Fernán-Coronas» de 2009. Trátase d'un volume de trenta y cuatro poemes ensin títulu, nel qu'alternen con ciertu desorde poemes narrativos, experienciales, xunto a otros más breves, con mayor capacidá de crear suxerencies idealizaes, pelos que parez dir entrando la ciudá. El títulu vien d'un versu de Philip Larkin, el maestru confesional de la poesía inglesa. Como nos dos llibros anteriores, Pérez Iglesias sal a mirar el mundu y lo qu'alcuentra ye la desolación de la vida rural que depicua, de la que llevanta una crónica sentimental extraordinaria, fecha sobre l'argumentación, concasando paisaxe, memoria, conocimientu y desazón interior. Ye lo que fai nel poema en prosa del llibru, «El día qu'echaron el cementu», un textu paradigmáticu de lo que ye la obra d'esti poeta: agudeza pa captar les sutileces del mundu, aparente facilidá y brillantez pa indagar nelles y explicales, y una llingua depurada y madura. Esto ye Héctor Pérez Iglesias: un poeta mayor, imaxinativu y fértil.

Compartir en Twitter
Compartir en Facebook

Globos de Oro 2019

Globos de Oro 2019

Conoce los nominados a los globos de Oro, las imágenes de la alfombra roja en directo y novedades de la gala