Cuando muerre a mediaos de 2001 de manera inesperada, l'asturianista Xosé Álvarez Fernández siguía dando vueltes a la idea de completar la publicación de la triloxía que consideraba la so contribución a la cultura asturiana escrita: d'un llau esti vocabulariu qu'acaba d'editar l'Academia de la Llingua, xunto col refraneru, que tamién dexó depositáu na institución asturiana de la que yera miembru correspondiente, y que sigue inéditu. El tercer llibru, los sos Cuentos, yá se publicara nel añu 2000. El refraneru, según referencia del propiu autor, parez ser una aportación más modesta que les de Luciano Castañón o de Sánchez Vicente y Cañedo, pa la que dalgunos amigos apurrimos dichos de la nuesa zona d'orixe.

Nesti «diecenu» cabudañu, la edición del Vocabulariu de Miranda ye'l meyor homenaxe que se-y podía facer al asturianista manudu y candial que tanta güelga dexó ente los que lu tratamos. Nun tamos delantre del llabor d'un lexicógrafu, sinón de dalgo quiciabes más importante: del esfuerzu constante d'un verdaderu amante de la fala del so conceyu natal (Álvarez naciera en Cigüedres en 1948, emigrando ensiguida a l'Arxentina pa instalase en Madrid a la vuelta). Dende finales de los años sesenta dedícase a apuntar les palabres asturianes coles que s'atopa, siguiendo l'exemplu de les monografíes elaboraes pola escuela pidaliana, que recueye los términos que nun coinciden col español (asina, nun se van atopar «puerta», «silla» o «coche», tan usuales). Pero Xosé Álvarez ye un testigu excepcional de cómo falaba la xente na segunda mitá del sieglu XX, polo que nos dexó un verdaderu monumentu al xeniu del idioma, a la manera en que s'expresen los falantes cuando naide ayenu al so entornu natural los «encuesta». Les definiciones van n'español, igual que facía la dialectoloxía del so tiempu pal casu asturianu.

De xemes en cuando («vaqueiru», por exemplu) l'apunte que fai ye cásique etnográficu, y sorprende que nun tea nesti llibru tol léxicu qu'aparez nos sos cuentos, como ye'l casu de «pierto» (cerca de), nun sé si porque nun ye palabra recoyida en Miranda, porque fuera un neoloxismu (nun ta en nengún diccionariu) o porque ensin más nun pasó al vocabulariu. Tamién llama l'atención qu'estreme «parola» (conversación) de «parula» (palabra). El repasu atentu del llibru trai bastantes novedaes, amás de refrescar la memoria a quien-y preste la precisión léxica. Quiciabes una de les aportaciones más llamatives de Xosé Álvarez seya la relación de numberales ordinales de raíz padrimonial (cuatrenu, cinquenu, seisenu, sietenu, ochenu...), d'onde pasó al diccionariu de García Arias (publicáu por LA NUEVA ESPAÑA). Sorprende qu'esos ordinales nun entraran nel Diccionariu de l'Academia, cuando tovía agora ye fácil sentir, en bonos falantes tradicionales, cinquenu o seisenu.