El númberu 33 de la revista "Asturies, memoria encesa d'un país", de la Fundación Belenos, lleva delles selmanes disponible nes principales llibreríes del país. Esta publicación, d'apaición añal agora, sigue tratando de mou seriu y fonderu al traviés d'ensayos y testos o estudios inéditos y orixinales de péritos y profesionales les estayes sociales, históriques, arqueolóxiques, xeográfiques, antropolóxiques, d'oficios, paisaxe y paisanaxe, de tradición y lleendes, música, llingua, ñatura, vezos o arquitectura l'Asturies conocida o la que s'ufrez dende este páxines de camientu p'averase a descubrimientos y sorpreses novalines.
La estaya "Memoria Gráfica" a la que-y ponen firma Gausón Fernande Gutierri y Alberto Álvarez Peña viaxa hasta la dómina de "La caza del bardión asturianu". Esi osu tan asturianu que, como señalen los autores, ye bardión en Salcéu, esbardión en Ricáu, albarción en Felechosa o albardión en Yanos. Y esbardu o alberciu si ye pequenu. Dende los que cazaron Oreyo y Pelayo al que mató al so fíu Favila. Dende los rellatos d'autores franceses, que señalaben que los montañeses vendíen cantidáes tremendes de pelleyes d'estos animales nos puertos de mar a los ingleses a testos de Xovellanos sobre "Catasayas" y el so pá "Mataosos". Referimientu a Toribión de L.lanos en L.lena que mató más de cincuenta a cuerpu descubiertu, dexándose abrazar por ellos na boca la lluriga y llantándo-yos el cuchiellu, igual manera qu'emplegaba quiziabes l'últimu cazador d'osos a cuchiellu, Anxelón de Zarréu (Degaña). El grabaú qu'illustra la tapa de la revista (de Féréal y Cuendias. París 1848) y estes páxines asoleyose na publicación "L'Espagne pittoresque...". Los bardiones y la lleenda ya historia de los sos cazadores ya se trataron n'otros númberos d'esta revista, pero la memoria gráfica qu'apaez n'esti númberu 33 presenta una montonera de semeyes d'interés colos retratos del Escobio, de Senén el de la Venta n'El Gumial cola caza. Semeyes de Carlos Flórez Lorenzo con un osu muertu en Saliencia (1925), la esfollaza d'un bardión d'Aquilino l'alimañeru na Pola Somiedu, d'esbardos cazaos por Pedro Pidal, marqués de Villaviciosa y otros cazaos nos montes de Llaímo, Muniel.los, nel Partíu Sierra, en Sorrodiles, Xerra Negra, Güerna y otros puntos d'Asturies.
