Cristóbal Ruitiña ye una cara conocida pal públicu de la televisión asturiana, onde ye redactor y onde tien presentao les noticies. Doctor en Comunicación y llicienciáu en Periodismu, ye tamién profesor de la Universidá Camilo José Cela de Madrid. Con eses blimes curriculares nun ye raro que-y prestara escazobellar na historia de la televisión asturiana p'apurrinos un apasionante relatu sobre les cuatro últimes décades d'esti mediu de comunicación. Ye posible qu'esta Historia de la televisión asturiana (1964-2006) debiera titulase "historia política" pa explicar meyor el so conteníu. Amás, anque fai referencia a los inicios de les emisiones de TVE n'Asturies, a partir de 1964, ocúpase principalmente de desentellizar los años ochenta y noventa, y la primer década del sieglu XXI.

Ruitiña (Cangas del Narcea, 1977) fixa l'atención nun momentu interesante nel desarrollu de la televisión n'España, cuando'l modelu centralista y exclusivista heredáu del franquismu se cuestiona dende les nacionalidaes perifériques, qu'echen a andar los sos propios modelos. Asturies, empeñada en facer España nun momentu nel que la historia afondaba nes peculiaridaes autonómiques, refuga en dos ocasiones la idea de poner en marcha la so propia televisión, a primeros y a finales de los ochenta, gastando tiempu y dineru n'intentar que fuera TVE la que se fixera cargu d'una programación propia, ensin llograr otra cosa que más o menos minutos de desconexión. Asina nació'l centru de San Esteban de les Cruces, n'Uviéu, pagáu por Asturies ensin que TVE cumpliera nunca los compromisos de realizar programes nél. Ye de destacar la puesta en marcha de la modesta Productora de Programes a finales de los ochenta, que permitió crear un importante bancu d'imáxenes de l'Asturies d'esos años.

La presencia nel Parlamentu asturianu del Partíu Asturianista, de la mano de Xuan Xosé Sánchez Vicente, introduz el tema de la televisión autonómica nel debate políticu de los noventa, del que tuviera prácticamente ausente hasta entós. Ruitiña fai cincapié, siempre que pue, na escasa y difícil presencia del asturianu na televisión pública y nes privaes, que se desarrollen nesi tiempu. Na década siguiente, fuera de la Xunta Xeneral los asturianistes, va ser el sector socialista encabezáu pol presidente del Principáu, Vicente Álvarez Areces, el que s'empeñe en poner en marcha una televisión autonómica, contra la opinión de bona parte del socialismu (col SOMA al frente), y de la derecha asturiana, que nunca consiguió explicar la so idea de televisión p'Asturies. Con abondes torgues, nacía asina l'ente autonómicu de comunicación, y en 2005 la RTPA, qu'empezaba a emitir de manera regular en xunu de 2006.

El detalláu llibru de Ruitiña, que contextualiza'l casu asturianu n'España y n'Europa, permite ver cómo Asturies llega a la televisión a pesar de que la clase política nun tuviera, les más de les veces, a l'altura del so mándáu. Y ye qu'hai dos coses clares nesti momentu: qu'a los asturianos présta-yos vese na so propia tele, y que nel sieglu XXI nun se pue vertebrar un territoriu ensin una televisión que s'ocupe de cohesionar la sociedá que lu habita.