30 de diciembre de 2013
30.12.2013

Música y palabres

La poesía lúcida, introspectiva y contenida de Ángeles Carbajal

30.12.2013 | 01:37
Música y palabres

Nes lliteratures con llingües en conflictu, como l'asturiana, hai poetes qu'asisten interesaos al procesu creativu que lleven a cabu los sos coetanios na llingua minorizada, pero que tarden en sumase a él, como si necesitaran que les agües turbulentes de cualesquier empiezu remansaran y el barru que train del monte posara nel fondu, como si fuera preciso que s'aclarara'l panorama. Pasó nos ochenta con Pablo Ardisana, Xosé Manuel Valdés y Concha Quintana, o nos noventa con Taresa Lorences. Tamién Marta Mori o Aurelio González Ovies tomaron dél tiempu enantes de publicar n'asturianu, como Miguel Allende, que se sumó con especial fuerza creativa. Ángeles Carbajal (Argüelles, Siero, 1959) acaba de sacar agora'l so primer llibru n'asturianu, En campu abiertu, depués de dos entregues n'español, La caligrafía de la distancia (1993) y La sombra de otros días (2002). Media ente cadún d'ellos una decena d'años.

A pesar d'esa década, y a pesar del cambiu de llingua, reconozse un mesmu tonu nos dos últimos llibros (el primeru nun lu conozo). Ye posible que nel asturianu seyan menos evidentes les cites lliteraries nes que s'apoyaba Carbajal, quiciabes porque'l maxisteriu qu'exercíen los poetes qu'homenaxeaba nel llibru del 2002 (Cernuda, Manrique, Juan Ramón Jiménez, Ángel González...) tea más interiorizáu, posara más. Pero tamién da la impresión de que determinaes palabres asturianes que remana la poeta (tresvolar, bastantina, tarrecer, pizcañar, raitán, sebe...) tienen un pesu específicu propiu, ensin que precisen soportase en referencies poétiques ayenes. Carbajal divide los trenta y nueve poemes que conformen esti llibru, premiu Teodoro Cuesta de poesía, en tres secciones que numbera con romanos.

Los siete poemes de la primer parte echen la vista atrás, faciendo recuentu de perdes y desamor: "Lo que pesa hai que posalo", diz un versu pal que trai la voz de los vieyos. Y qué meyor qu' "un llibru / (...) pa colocar nel so sitiu l'amor". Na segunda parte son venti los poemes que nos entrega Ángeles Carbajal. Dende la contemplación meditativa de la naturaleza fala del pasu del tiempu ("El futuru / ye lo mesmo que'l pasáu / pero ensin futuru"). Vuelve una y otra vuelta sobre la derrota existencial qu'enllena unos versos nos que nun hai desesperación, nos que llate entá la vida. Na tercer parte del llibru son la mirada y les referencies al pasáu les constantes, ensin dexar que la apodere la señaldá, preparándose yá pa lo que pueda venir: "Nel vivir / menudu de la sebe / (...) caún / pasa fríu a la so manera / y muerre solu". Confórmase con qu'una cierta malenconía lo amugue too.

La de Carbajal ye una poesía lúcida, instrospectiva y contenida, intelixente, a ratos desolada anque siempre hebia nella resignación y vida. Nun ye raro que ponga a dialogar distintos poemes, y sabe captar l'instante sacando d'él una reflesión de validez universal. Da la impresión de que la llingua asturiana, manexada con soltura y oficiu nun llibru que miez sabiamente música y palabres, retórica y silenciu, llega a Ángeles Carbajal pa quedase. Una bona anuncia.

Compartir en Twitter
Compartir en Facebook