17 de marzo de 2014
17.03.2014
Con llingua propia

Conmoción existencial

La desolación creadora de Héctor Pérez Iglesias en La mano vacía

17.03.2014 | 01:42
La mano vacía. Héctor pérez iglesias. Premiu «Llorienzu Novo Mier». Uviéu, Academia de la Llingua Asturiana, 2013.

Na nota que figura al final del llibru Dende tan lloñe (E-Sguil, 2012), la editorial da cuenta de que La mano vacía yá tien ganao'l Premiu Novo Mier de l'Academia de la Llingua Asturiana. Esa referencia permitiría pensar qu'esta nueva entrega d'Héctor Pérez Iglesias (Arlós, Llanera, 1978), la séptima suya n'asturianu, había figurar cronolóxicamente enantes d'esi llibru mayor que ye Dende tan lloñe, abigarráu y reiterativu, vibrante y sentenciosu, herméticu y paradóxicu, que tarrezo que pasara desapercibíu al publicase en formatu electrónicu y de pagu, dos novedaes poco habituales ente nós. Pero hai más razones pa situar La mano vacía delantre de Dende tan lloñe: el grupu principal de los poemes que componen esti premiu de l'Academia podía incorporase al llibru del 2012 ensin qu'el conxuntu se resintiera, como si conformaren (xunto cola mayor parte d'Aquella xente nunca sabía aú llevaben les carreteres xunta les que vivíen, del 2011) un mesmu ciclu poéticu.

"La xelada ye un exércitu d'ocupación", repite Pérez Iglesias como un leitmotiv a lo llargo de la segunda parte de Dende tan lloñe, y esi versu, que ye un poema, podía figurar ente los de La mano vacía, una entrega que camina en círculos pel fríu, dando vueltes a dos palabres coles qu'empiecen siete de los trenta y seis poemes: "Aquel iviernu". La conclusión topámosla fuera del corpus, nun versículu que pieslla'l conxuntu y que nun aparez nel índiz: "Desangrame de fríu ? aquel iviernu que nun acaba de caltrizar". Fríu y nueche son constantes, y d'ellos namás se sal violentamente al terminar la llectura: "Pel horizonte / aprucen ñubes de gasolina anunciando / un alborecer de napalm". Ensin perder del too les referencies cotidianes, la mayor parte del llibru busca la materialización de lo abstracto, la mineralización de les sensaciones: "el terciopelu sospechoso del horóscopu" o "la nueche rincha / áspera al zarrase sobre nosotros"); hai dellos poemes que son pura construcción verbal, como'l tatexante "Quién dixo, cuando entós".

Pero, por si fuera poco, nel llibru hai un puñadín de poemes que ruempen esi irracionalismu discursivu, qu'abandonen l'artificiu verbal, como si l'autor quixera danos un respiru cambiando l'experimentalismu pola experiencia. A esti grupu pertenecen, por exemplu, los qu'empiecen "Tengo colgaes nel facebook trescientes / ventinueve fotografíes", "Posasti la cuyar sobre / el mármol", "Aquelles formes de matar una camada de gatos recién / ñacíos", "Pasé xunta la sala / de los recreativos" o "Nun podíen ser muncho más moces qu'él", poemes nos que fixa l'atención en situaciones concretes, resolviéndolos de manera directa y expresionista.

Nos poemes más zarraos de Pérez Iglesias hai dalgo que remite al Antonio Gamoneda de Descripción de la mentira: la construcción pasional qu'avanza y retrocede a semeyanza de les foles del mar, les fórmules repetitives, l'irracionalismu nel que conviven lo abstracto y lo sensorial... Pero tamién nos recuerda a esi poeta portugués que ye Herberto Helder, sorprendente y únicu, col que comparte una similar manera de facer el poema: acarretando pa él una lóxica del discursu rota por ecuaciones del llinguaxe novedoses y lúcides, p'armar un artefactu nel que la vehemencia imaxinativa y la desolación creadora van dando cuenta de la conmoción existencial.

Compartir en Twitter
Compartir en Facebook